Shillong, Jymmang 30
Ka jingther u slap naduh ka janmiet ka 28 tarik Jymmang kaba la bteng haduh ka 30 tarik Jymmang ka la pynlong ban shlei um ha Nongmensong bad Langkyrding kat haduh ba ki paidbah kim nud shuh ban ïaid kjat.
Kane ka jingdap um na surok bah sha Langkyrding- Nongmensong ka la sdang ha ka Sngi Thohdieng ha ka por 7:00 baje mynstep haba u slap u la hap naduh mynmiet khlem sangeh.
Ha kane ka jingjia la ïohi ba wat ki kali kiba ïaid na kane ka surok sha Langkyrding ka um ka la tap mar shiteng.
Katba kiba sah ha kane ka dong ki hap ïaid da ka kjat suda ne phong slipper namar kim nud shuh ban phong juti.
Ka jingdap um ka surok ka dei namar ka nala kaba tuid sha jingkieng kaba don surok ka long kaba rit.
Katba ka lynti kaba don syndah bad ka skul BDW International School ban leit sha Langkyrding ka la dap um kaba la buh jingeh ïa ki paidbah kiba ïaid bad ïeng khamtam ki khynnah skul kiba leit sha Bellefonte Community College Lumshyïap.
Nangta, ki briew kiba sah ha kawei ka longïing ki la shah kerkut namar ka um kaba shlei sha surok ha ki thaiñ Pynthorumkrah ka la dap um haduh phyllaw.
La ïohi ruh ba bun ki kali rit kiba ïaid na Nongmensong bad kiba wan na ki thaiñ Pynthor ki la hap phai noh namar kim nud shuh ban ïaid ba la dap um hapdeng surok.
Ka jingdap um hapdeng surok bad poi ka um ha phyllaw ïing briew ka dei namar ka um kam lah ïaid shuh na ki nala kaba don syndah bad ka jingkieng kaba dang shna thymmai.
La ïohi ba ki scooty kiba la ïaid hapdeng surok kiba la sahkut bad hap ban shu khynñiat.
Ki kali rit kiba bun ki la hap phaidien biang kiba wan na jingkieng Seng Khasi College bad ruh na Mawlai Nongpdeng haba ka surok kaba don ha Mawlai Nonglum ka la dap um ha kane ka sngi.
La ïohi ba wat ki briew kim nud shuh ban ïaid namar ka jingheh ka um hapdeng surok.
Kumjuh, la ïohi ïa ki briew kiba sah shiliang ka surok ki la ïeng hajrong ïing namar kim lait shuh ban mih ba la dap um palat ka surok.
Haba ïakren bad ki ‘riew paidbah ki la ïathuh ba kane ka jingdap um hapdeng surok namar ka um ba tuid na ka nala kam leit shuh sha Wahumkhrah namar ba ka la heh um palat.
Ki la ïathuh ba kane ka jingshlei um ka ju jia man ba ther u slap.
