Nongstoiñ, Jymmang 30
Ha ka Sngi Thohdieng jong ka taïew kawei ka dukan ha ka shnong Mawkadiang, West Khasi Hills ka la pra bad julor hi khait na ka jingshah ban ha ka khyndew bad u maw na ka jingtwa khyndew.
Katkum ka tyllong khubor na ki nongshong shnong la ïathuh ba katei ka jingjia ka la jia ha ka por 5.30 janmiet hapdeng ka jingjur jong u slap.
La ïathuh ba ha katei ka dukan, ki don kumba 12 ngut ki briew kiba dang ïa shong, hynrei, katba kine ki briew ki dang ïa shong ha katei ka dukan ki la ïohsngew bad ïohi ïa ka jinghap jong ka khyndew bad lyngba kane ka jinghap jong katei ka khyndew baroh ki la ïa mih noh na katei ka dukan bad donbok ba mar ïa mih na katei ka dukan u maw uba heh bha u la hap ha katei ka dukan bad ki la lait na ka jingmynsaw.
Shuh shuh la ong ruh ba katei ka dukan ka dei jong ka Kong Twissinoris Wanniang ha kaba la ong ba ka jingujor ka la long ïa baroh kawei ka dukan.
