Shillong, Jymmang 30
Ka jinghap jong u slap bajur bad u lyoh uba rben ha ki thaiñ Sohra bad ha Shillong ka la pynlong ïa ki pulit bad ki bahaïing ban sah ha ka umdum namar kat haduh mynta kim pat lapdien ïa ki shikurim kiba la jah naduh ka 23 tarik mynta u bnai haba ki la wanphai na Nongriat.
Kine shikurim kiba na Indore, Madhya Pradesh kiba la jah rngai naduh ka 23 tarik mynta u bnai hadien ba ki la wanphai na Nongriat katba ïa ka scooty ba la pynïeng ha Domlakhiat kam don shuh hynrei la lap harud surok Sohra Rim.
Ka jinghap u slap ba khlem sangeh bad ka jingrben u lyoh ka la sdang ha ka janmiet jong ka 28 tarik Jymmang bad bteng pat ha ka Sngi Thohdieng ka 30 tarik Jymmang.
Namar ka jinghap jong u slap bad wan tap sa u lyoh uba rben ka la pynthut ïa ki pulit ban leit wad namar kim lah ban pynher ïa ka drone sha suiñ bad kim lah ban ïohi haba kah u lyoh.
Wat lada pynthut u slap, hynrei ki pulit bad ka kynhun Search and Rescue Team, SDRF ki dang bteng ban leit wad ïa kine shikurim sha Nongriat kaba hap ïaid kjat shi kynta por hiar bad ar kynta por wan phai.
Haduh mynta ka sngi ka 30 tarik Jymmang, ki pulit ka East Khasi Hills District kiba don ha Sohra bad Shillong ki dang bteng ban leit wad kylleng ki jaka ha ki thaiñ Sohra kum ha Sohra Rim, Nongriat, Domlakhiat bad don kiba leit wad na ki thaiñ Tyrna ban poi sha Nongriat.
Kum ban shu pynkynmaw ki pulit ka Sohra Civil Sub Division ryngkat ka kynhun SDRF bad ki nongkitkam shnong Sohra Rim ki la leit rung sha ki khlaw bad hiar sha ki riat kiba don ha Sohra Rim naduh ka 27 tarik Jymmang 2025 ban leit wad ïa kitei shikurim.
Kine shikurim kiba la jah rngai ki long ka Sonam Raghuvanshi bad u Raja Raghuvanshi kiba la poi sha Domlakhiat ha ka 22 tarik mynta u bnai da ka scooty kaba la shim wai na Shillong ban leit sah miet sha Nongriat. Ha ka 23 tarik Jymmang ynda ki la wanphai na Nongriat naduh kane ka sngi ym shym la ïohi shuh ïa ki namar ka scooty kaba ki pynïeng ha Domlakhiat kam don shuh hynrei la lap najan ka Golden Pines Dhaba kaba don ha Sohra Rim.
Kane ka jingleit wad ki pulit sha khlaw bad riat ha Sohra Rim ka dei namar ki la lap ïa ka scooty najan ka Golden Pine Dhaba.
Namar bym lapksai eiei, ki pulit ha ka 27 tarik mynta u bnai ki la hiar biang sha Nongriat ban ïaid lyngba ka shnong Domlakhiat kaba dei ka lynti ba ki wanphai na Nongriat.
Haduh mynta ki bahaïing jong kine ki shikurim ki dang don ha Sohra ban leit wad lang bad ki pulit.
Namar ka jingbym pat lapksai ïa ka lynti ba ki jah, ka la pynsah umdum ïa ki bahaïing bahasem bad ïa ki pulit jong ka jylla Meghalaya namar ka jingpynthut u slap uba hap khlem sangeh.
