Ka jingdon jong ki arshaka, ka la long shisha ka jingpynsuk ha ka leit ka wan khamtam lei ha kum kane ka por jong ka jingjur ka dheng kali kat shaba phai ne leit. Ki arshaka ki la pynsuk bad pynkloi ïa ki nongleit nongwan ban poi biang por sha ki jaka. Ka jingjur ka dheng kali, ka la ktah shi katdei bad lada shong da ki kali saw shaka, yn nym poi ne lah ban pyndep kam. Ka nongbah Shillong ka la long shisha ka jaka kaba la khapngiah bha khamtam lei na ka jingnang mih bun jong ki kali, khamtam lei ha ki por long trei bad long skul, ha kaba kum ki nongleit nongwan ki la mad shisha ïa ka jingsohsat.
Ngi lah ban ïohi ba ka jingdon jong ki arshaka ruh ka la kiew bha ha nongbah Shillong. Hynrei kumba ka paw mynta, ha ka jaka ba kine ki arshaka kin pynsuk ïa ka leit ka wan, ka paw pynban kum ka jingbuh jingma ïa ki nongleit nongwan namar ym ithuh ithaw shuh ka rukom ïaid ka jong ki. Ki la shu bsuh kat naba lap ba shem, khlem da pyrkhat shuh la kan long kaba shngaiñ ne ka ban buh jingma pat ïa kiwei. Ngi ïohi ha kylleng ki bynta jong ka surok la ka long ha nongbah Shillong ne wat sha ki khapsor, ïa ka jingbun jong ki arshaka kiba hiar bad ba kiew. Hynrei ngim lah pat ban tip, ba balei bad haduh katno ki kyrkieh ne ki don ki kam kiba kyrkieh. Balei ban kyrkieh haduh katta katta, nalor ba kim donkam ban shong sahkut ha ka dheng kali.
Ka rukom ñiah bad pynher lei jong kiba bun khamtam kito kiba dang rit ka rta, ka long shisha kaba ima haduh katta katta. Ym sngewthuh ne tip ba balei ki kyrkieh shaba palat. La i thik ba ka surok ka la dei ka jong ki. Ki ïaid bad her katba mon, rung na ka diang rung na ka mon, khlem da burom shuh ïa kiba wan na ka liang pyrshah. Ki don ki khep haba ka don ka dheng kali, kine ki arshaka ha ka jaka ba kin burom lem ïa ki kali kiba wan ka liang pyrshah, hynrei ki tur beit bad da poi hajan ki leh kum ban pynphai ïa u steering, hana ban pyni ba ki burom hynrei kim tip pat ba nadien jong ki, la wan tur shuh shuh ki arshaka, haduh ba la mih da ki saw san lain, haduh ba ka kali ba wan na ka liang pyrshah kam ïoh ïaid shuh.
Ngi la sakhi ruh ba kane ka rukom ñiah bad pynher sted bad kaba ñiah thurmur, ka la wanrah bun ki jingjia ïatyngkhuh kali bad haduh ki jingjia ba sngewsih ruh kumjuh. Imat kine ki jingjia, ki jingïatyngkhuh kali, kim pynpei shkor ïa ki, kawei ka dei ba kim pat ngat ïalade bad kumta ki dang don beit ka jingsngew long ‘Hero’ ban pyni ba kum ma nga te ym don kiba shlur. Kim kheiñ snep satia la ki ïaid ruh na ki jaka ba don ki skul khamtam ha ka por wai skul. Ka jingthmu jong ki, katkum ka rukom ñiah ka long beit ban jam shakhmat. Phi lait ne phim lait ngim tip, tangba ngi la ïoh lad ban bsuh ban jam shakhmat ngin tur beit, kane ka dei kaba don ha ka mynsiem leh baheh bad sngew khraw.
Ka tnat pulit pynïaid kali ka la dei ban leh da kaba tyngeh ïa kine ki ‘hero’. Watla ka tnat pulit bunsien ka la pynmih ki jingkyntu bad jingmaham ba kum ki nongñiah arshaka ki dei ban bud ïa ki kyndon aiñ bad khamtam lei ban kiar na ka bynta ka diang. Hynrei kine baroh ki jingkyntu bad maham, imat kim treikam ne rung ha kine ki ‘hero’, ki ïaid beit ha la ka mon bad ha la ka jingkwah lajong. Ym tang ba ki ïaid katba mon, hynrei phin lap ruh ba ka jingpynïeng ïa ki arshaka ruh ka long ha la ka mon. Ki pynïeng beit kat ha ki jaka kaba ki sngewmon, khlem da pyrkhat la uba ïaid nadien un lait ne em. Tang ba la biang ïa lade, kam pher lada kiwei ki syrtok ruh.
