Shillong, Jymmang 30
U MLA ka Nongkrem Konstitwensi, Bah Ardent Miller Basaïawmoit uba dei ruh President ka Voice of the People Party (VPP), u la ong ba wat kiba la pyndep ïa ka kyrdan Doctor of Philosophy ki dang shah thok ki dang shah pynbiej namar ki tip beit tang ïa ka jingpule jong ki, kumta haba im ha ka pyrthei kaba sniew donkam ban long kiba siañ bad shemphang.
Ïa kine ki kyntien u Bah Ardent u la kren kum u kongsan haba plie ïa ka kamra klas jong ka skul St. John Bosco School Laitkor Mawrie Lumheh kaba la mang na ka skhim SRWP 2023-24 bad kot 15 lak tyngka kaba la long ha ka Sngi Thohdieng ka 30 tarik Jymmang 2025.
Ha kane ka sngi la ïadonlang u MDC ka Nongkrem Konstitwensi, Bah Kitbok Syiem kum u symbud kongsan, Secretary School Managing Committee Fr. Sylvester Synrem uba dei Parish Priest Laitkor Parish, Rangbah Shnong Laitkor Mawrie Lumheh, Bah Pynshai Mawrie, ki nonghikai bad ki khynnah skul.
U Bah Ardent u la ong ba ïa ka jingstad bad jingtip phi lah ban ïoh ha kamra klas hynrei ïa ka jingshemphang donkam ban trei shitom bad ban pan na u Blei.
U la ong haba don ka jingshemphang phi lah ban pynïapher na kaba sniew bad na kaba bha.
U la kyntu ïa ki khynnah skul ban siew kylliang ïa ki kmie ki kpa bad ki nonghikai da kaba khreh kot bha bad kohnguh ïa ki nongsneng nongkraw.
Shuh shuh, u Bah Ardent u la ong ba ka sorkar jylla kam shim khia ha ka pule puthi namar dei ki skul balang kiba la pynkiew ïa ka jingpule hapoh ka jylla.
U la ong kiba bun ki nongshong shnong, ki nonghikai, kiba trei home guard, kiba trei kontrak, ki nongrep ki hap ban shim da ka ram, kumta u kwah ban wanrah jingkylla na ka bynta ka lawei ban sa wan.
