New Delhi, Jylliew:
Ka tnat kam bar ri jong ka India ha ka Sngi Palei ka la iathuh ba ka India ka la khang noh ia ka jingiatreilang bad ka United States haba iadei bad ka liang ki phetwir bad ki nongbuhai shnong na katei ka ri sha India bad na India sha katei ka ri, hadien ba ka United States ka la pynphai iing ia kiba bun ngut nong India kiba leit shong sha US khlem ki kot- ki sla kiba biang.
Namar la ong ba naduh u Kyllalyngkot 2025, ki don kumba 1080 ngut ki nong India kiba la shah beh na US bad kiba la wan phet biang sha India hadien ba ki la im bad kamai ja kpoh ha US baroh shi katta ki snem ba la leit.
Kumta, u Myntri ka tnat kam bar ri ka India, u Randhir Jaiswal u la ong ba ka tnat kam bar ri ka India, ka la khang noh ia ka jingiatrei lang hapdeng ka India bad US haba iadei bad kane ka mat jong ki phetwir, hadien ba ka US ka la pynphai iing ia palat shi hajar ngut ki nong India kiba shong- ba sah ha US baroh shi katta.
U Jaiswal u la kren ruh halor ka jingiakajia kaba mynta kaba iadei bad ka sorkar US hapoh ka jingialam jong u Trump bad ka Harvard University. U la kdew ba u tip shaphang ki jingeh bad ka jingbthah ba la pynthymmai jong ka sorkar US ha kaba iadei bad ki nongaplai ia ka Visa ban pule ha US.
U la jubab da kaba ong ba na ka bynta ka Sorkar India, ka jingbha jingmiat jong ki samla pule na India kiba don shabar ri ka long kaba kongsan tam bad ka India kan dang bud ïa ki jingjia kiba hadien ha kaba ïadei bad kane ka mat.
U Secretary of State jong ka US pat, u Marco Rubio ha ka Sngi Balang u la bthah ïa ki tnat Embassy jong ka US ha kylleng ka pyrthei ba kin nym buh por ïa ki jingïakren thymmai na ka bynta ki samla pule-Visa namar ba ka sorkar u Trump ka dang pyrkhat ban pynjur ia ki jingpyrkhing nangne shakhmat.
Namar kata, la ong ba kane ka jingbthah kan nang wanrah jingeh shuh-shuh ia ki samla pule ba nabar ba kin ioh ban rung sha ki skulbah bad ki kolej jong ka US ha kine ki sngi ki ban wan.
