Shillong, Jylliew 01
Ka jinglong-jingman ka suiñ bneng namar ka jingjur ka lyer bad ka jingther u slap ha kine ki khyndiat sngi ba la dep ka la ïalam sha ka jingjulor jong ki phew tylli ki ïing bad ka jingshah ktah jong palat hajar ngut ki ‘riew paidbah.
Haba phai sha 23 tylli ki Block ha ki 10 tylli ki distrik jong ka Jylla ba kynthup ïa ka East Khasi Hills, West Garo Hills, Eastern West Khasi Hills, Ri-Bhoi, South Garo Hills, West Jaiñtia Hills, South West Garo Hills, East Jaiñtia Hills, South West Khasi Hills bad West Khasi Hills, ka jingdon jong ki shnong kiba shah ktah na ka jinglynshop mariang naduh ka 29 tarik Jymmang haduh ka 1 tarik Jylliew, 2025 ka long 86 tylli.
Ha kajuh ka por, ki don 1221 ngut ki nongshong shnong kiba shah ktah nalor 37 tylli ki ïing ki sem kiba la julor.
Ka jingdon jong ki briew kiba la duh noh la ka jingim ha kine saw sngi ka long 6 ngut nalor 4 ngut kiwei pat kiba la mynsaw.
Nalor ki ïing kiba la julor, ka kyrwoh na u Executive Director ka State Disaster Manage-ment Authority (SDMA) ka ong ba ki don ruh 45 tylli kiwei pat ki jingtei kum ki lynti ïaid kjat, kynroh, jingkieng, surok, skul, dukan kiba la julor nalor ka jingshah ktah jong ki laiñ bording ha kiba bun tylli ki shnong.
Kumjuh, ka jingdon jong ki jingthung kiba shah ktah na ka jinglynshop mariang ka long 0.202 Ha.
Haba phai pat sha ki jingjia ha ka 1 tarik Jylliew, ka la don ka jingtwa khyndew ha ka shnong Umskun bad Umjari-Umtrai kiba hap hapoh Umling Block, Ri-Bhoi District kaba la ïalam sha ka jingjulor jong ar tylli ki surok.
Haba ïadei bad kine ki jingjia, na ka liang ka tnad ba dei khmih jong ka PWD, ka la bthah ïa ki kontraktor ban shim ïa ki sienjam ba donkam halor kane ka bynta.
Shuh shuh na ka liang ki bor ba dei khmih ki la pynbiang ruh ïa ki lad jingïarap ha ka rukom jong ki marbam sha kito ki longïing kiba shah ktah.
