Shillong, Jylliew 01
Ka jingjia shah leh khlemakor kawei ka khynnah skul ha uwei u briew ïa uba la tip kyrteng kum u Himan Gogoi, 24 snem ka rta kaba la jia ha ka 23 tarik Jymmang, 2025 ha Umsohsun kala pynbitar shikat dei eh ïa ki paidbah ka Jylla.
Kum ban shu kdew hangne, u Himan Gogoi udei u briew uba la donkti ha ka ban khyllied skat ïa kawei ka khynnah skul bad shondur katba ka dang ïaid lynti ban leit sha skul kaba la jia ha Umsohsun haka step phyrngab jong ka 23 tarik Jymmang, 2025, ha kaba ki pulit ki la pynrung kyrteng halor katei ka jingjia ha Lumdiengjri Police Station.
La lap ruh ba une u runar u dei uba la shah pynngat ha ki jingdonkti ha ki kam runar ha Teok Police Station.
Nalor kata, utei u briew u dei ruh uba la shah pynrung mukotduma ha Sadar Police Staion halor ka jingshah kynnoh ba kawei pat ka khynnah skul ka la shah leh khlemakor ha utei ujuh u runar ha ka 19 tarik Jymmang ha ka por 7:30 shiteng mynstep hajan Dreamland, Khyndailad.
Hashwa ba utei u runar un wan sha kane ka Jylla ban trei bylla ha kawei ka jaka bam, u dei ruh u briew uba la donkti ha kiwei pat ki kam runar kiba la pyngngat pyrshah ïa u ha Teok Police Station Jorhat.
Naka liang u General Secretary ka Seng Hynñiewtrep Youth’s Council (HYC) haka 30 tarik Jymmang, 2025, u Bah Rhemdor Saiborn ula ong ba kine ki briew kiba wan na kiwei ki Jylla shapoh ka Jylla Meghalaya, ki dei kiba ju wan haka dur ban trei ïa ki kam-ki jam da kaba rung ha ki kam shet jingshet, ki karkhana shna kali kum ki nongbylla bad ha ki bynta bapher-bapher hynrei kaba eh ka long ba hapoh ka Jylla Meghalaya, kam ju don ka jingpan ïa ka ‘Police Verification’ na ki Jylla ba kitei ki briew ki wan bad kane kala wanrah jingeh ban sngewthuh bad lap la ki dei ki briew kiba don dak sniew ne ki bym don sha ki Jylla jong ki.
U Bah Saiborn ula ong ba ka jingdawa ka Seng naka Sorkar bad ki bor ba dei khmih ba kin pan ïaka ‘Police Verification’ na ki briew kiba wan nabar ka Jylla khnang ban lait na kino-kino ki jingjia kiba sniew.
“Ngi sngewthuh shai ba ka Sorkar kam lah ban pyntreikam ïa kane hynrei ka jingdawa jong ka Seng ka dei beit ba ka Sorkar bad ki bor ba dei peit nangne shakhmat khnang ban lait na kum kine ki jingjia baroh, ki dei ban pyntreikam ïa ka ‘Police Verification’ khnang ban lait na kino-kino ki jingjia kum kito bad khnang ba ki briew kiba don ïaka dak sniew, kin nym ïoh ban wan bsuh khlieh bad ban trei ïa ki kam-ki jam ha kane ka Jylla jong ngi”, ong u Bah Saiborn.
