Shillong, Jylliew 01
Ka Paris Saint-Germain (PSG) ka la long ka lahduh ha ka Champions League ha ka sien kaba nyngkong eh hadien ba kane ka kynhun jong u Luis Enrique ka la lah ban pynliem ïa ka Inter Milan da 5-0 kol ha ka step jong ka Sngi U Blei bad u rangïalehkai ba dang khynnah u Desire Doue u la thep ar kol.
U Achraf Hakimi, uba ïakhun pyrshah ïa la ka klob barim, u la long uba nyngkong eh ban pynkhih jar na ka bynta ka PSG ha ka minit kaba 12 bad ïa ka kol ba ar la thep da u Doue na ka bynta ban tam ar kol ha ka kylla step.
U Doue (63) u la thep biang ïa ka kol ba ar ha ka kylla miet ha shwa ba u Khvicha Kvaratskhelia (73) un thep ïa ka kol kaba saw. Ha shwa ban wai ka PSG ka la thep biang sa shi kol lyngba u Senny Mayulu (86) na ka bynta ban ïoh shi syndon ïa ka jingjop.
Kumba ka paw na katei ka jingïalehkai ki rangïalehkai ka PSG ki la lah ban ïalehkai bha naduh kaba sdang ha kaba kim shym la ailad ïa ki rangïalehkai ka Inter. Kane ka long ka jingjop kaba khraw eh ïa baroh ki kynhun ïalehkai ha ki jingïakhun final ha ki 70 snem ha ka European Cup bad Champions League.
“Kane ka jingjop ka mut ïa baroh. Ka dei ka jingangnud jong nga, ka dei ka jingangnud jong ngi lang baroh. Ka long ka bym lah ban ngeit. Nga sngewkmen ba ngi lah ban leh kumne bad ngi la ïoh ban lehkmen,” la ong u Vitinha, rangïalehkai shapdeng na Portugal, uba long ruh uwei na ki rangïalehkai ka PSG.
Kane ka dei ka sien ba ar ha ka Champions League na ka bynta u coach ka PSG, Luis Enrique, uba la lah ban pynjop ïa ka Barcelona ha ka por ba dang-ïalehkai u Lionel Messi ha ki shiphew snem mynshwa.
