Ka jingjia dang shen halor ka jingjah rngai jong ar ngut ki shikurim kiba na Indore ha Madhya Pradesh bad ruh ka jinglap ïa ka metïap jong uwei u samla uba la hap sha Wah Umngi katba u dang leit tong doh bad ki para shnong ha kawei ka thwei kaba tip kum ka Shar-Shar bad ym tang kine hynrei ngi ju sakhi na ki por sha ki por kum kine ki jingjia, ki la wan jia ym tang ïa ki nongshong shnong ka jylla hynrei wat ka jingduh noh ïa ki mynsiem jong kito ki nongwan jngohkai pyrthei.
Ngi sngewsih shikatdei halor kane ka jingjia jong ka jingshah rong um jong utei u samla uba la hap shapoh ka um namar ka jingduh ïa ki mynsiem briew ka dei ka kam bah kam san. Ha kawei pat ka liang haba phai sha ka jingjia jong ka jingjah ki shi kurim ha ki thaiñ, ngi sngew sarong bad sngew ban ai mynsiem ïa ki pulit, ki kynhun SDRF bad ruh ïa ki paidbah nongshong shnong ka thaiñ Sohra kiba la pynlut la ka sngi bad ka por ban leit wad ha kylleng ki bynta jong ki jaka jngohkai ban lapdien ïa ki ar ngut shikurim.
Ha kum kine ki por ba jur ka jingther jong u slap namar ka jingwan poi ka aïom lyiur, ngi sakhi ba ki don bun ki nongjngohkai pyrthei kiba smat ban leit kai sha ki thaiñ Sohra ne wat sha kiwei kiwei ki bynta ban ïoh sakhi da lade ïa ka jingitynnad ka mariang bad peit ïa ki kshaid kiba itynnad bad kiba noh rymphum. Hynrei ki dei ruh ban kynmaw ba ka jingleit sha kum kine ki jaka khamtam haba hap slap bad dum ka bneng ka don la ki jong ki jingma lada ngim phikir. Ngim kwah ban ïohi ïa kiba kum kine kiei-kiei kin wan jia. Kumta ka long kaba donkam ba kum ha kine ki por haba hiar sha kum kine ki jaka, dei ban long kiba phikir bad husiar bha khamtam ban da kylli bniah halor ka jinglong jingman jong ka jaka ne ban ïalam ryngkat ïa ki trai shnong kum ki nongpyni lynti. Baroh ngi ju sngewtynnad ban hiar ban kiew ïa ki lum ki wah namar kane ym tang ha kaba ngi lah ban sakhi ïa ka jingitynnad jong kita ki jaka hynrei ha kajuh ka por ki long ruh kum ka dawai bah na ka bynta ka koit ka khiah jong ka met ka phad. Ngi dei ban sngewthuh pat ba ha kum kine ki por ba ka don ka jinghap slap kaba neh da ki bun bun kynta ne wat da ki sngi, ka ju pynshong synjor ïa ki bynta lum bad buh jingma ha ka leit ka wan. Khamtam lei haba kiew ne hiar sha ki lum ne ki riat, lada ym dei kiba tip bniah ïa ka lynti ïaid, ka lah ban buh jingma, namar ngim tip haduh katno ka lynti ka skhem bad ka long shngaiñ ban ïaid ban ïeng.
Ha kajuh ka por, ka long ka jingkyntu ïa ki shnong ki thaw bad ki trai shnong ba kin hikai bad ai jingtip kiba bniah ïa ki nongwan jngohkai khnang ba kin tip bad sngewthuh kumno ban phikir bad husiar lypa ne lada sngew donkam ban hiar sha ki jaka kiba kham noh bad itynnad ban ïalam lang ïa ki trai shnong kum ki nongsynran. Kum ki nongjngohkai ruh ki dei pat ban kiar na ka jingleh shlur khlem jingtip namar kan ïalam sha ka jingmynsaw bad kan buh jingeh ïa kiwei pat. Ngi kyrmen ba nangne shakhmat, kum kine ki jingjia kin ym jia shuh bad kane kan urlong tang lada ngi long kiba phikir bad husiar. Lada ngi ïa long phikir lang, ngin lait na kum kine kiei-kiei baroh.
