Shillong, Jylliew 01
U Nongïalam ka Liang Pyrshah ha ka Ïingdorbar Thawaiñ ka Jylla bad uba dei ruh u Myntri Rangbah barim ka Jylla, Dr. Mukul Sangma ha kine ki khyndiat sngi ba la leit, u la leit ban jurip ïa ka Community Health Centre (CHC) kaba don ha Chokpot, South Garo Hills.
Kane ka jingleit jurip jong u Dr. Mukul Sangma ka long shibynta jong ka jingpyrshang kaba dang ïaid shakhmat ban sngewthuh ïa ki jingeh kiba ju ïakynduh na ka por sha ka por bad ban bishar bniah ruh ïa ki jingeh kiba ïakynduh da ki jaka sumar bad ki paidbah ha ki jaka sumar kiba don ha ki thaiñ nongkyndong.
U Dr. Mukul u la ïakren bad ki doktor, ki nos, bad ki nongtrei jong ka CHC bad u la ai khublei ïa ka jingtrei shitom bad ka jingaiti lut jong ki ha ka ban pynbiang ïa ki lad ai jingshakri ha ka liang ka koit ka khiah wat hapdeng shibun ki jingeh.
U la pynshlur ruh ïa ka kynhun jong ki doktor ban pynlong ïa ki jingïalang jong ka Hospital Management Committee (HMC) man ka por ban pynthikna ïa ka jingïatreilang kaba kham bha bad ban weng ïa ki jingeh ha ka jingtreikam khnang ba kan long kaba kham bha. Ha kane ka jingleit jngoh, u Dr. Mukul u la shimkhia ïa ki jingeh bapher-bapher kiba la ïasam lang da ki nongtrei bad ki nongshong shnong, bad u la pynthikna ïa ka jingkyrshan bad jingïatreilang kaba pura ban wad ïa ki lad ki lynti kiba biang ban pynbeit ïa ki jingeh. U la pynpaw biang ïa ka jingdonkam jong ka jingsynshar kaba sngewthuh bad ka jingshakri kaba paka, khamtam ha ki thaiñ kiba duna ka jingshakri kum ka Chokpot.
U Dr. Mukul u la pynpaw ruh ïa ka jingsngewkmen halor ka jinglong ba shisha ba la pyni da ki nongtrei ka koit ka khiah bad u la ai kitbok-kitrwiang ruh ïa ka kynhun baroh kawei ha ka jingpyrshang jong ki ban shakri ïa ka imlang-sahlang.
