Shillong, Jylliew 01
U Deputy Commissioner (DC) jong ka West Jaiñtia Hills, Abhinav Kumar Singh, u la pynmih ïa ka hukum ba la bthah ban khang khyrdep shwa ïa baroh ki jaka jngohkai pyrthei hapoh ka district, kaba la sdang naduh ka 31 tarik Jymmang.
Katkum ka hukum, u Deputy Commissioner u la ong ba ka jingïai bteng ka jingslap hapoh ka district ha kine ki khyndiat sngi, ka lah ban buh jingma ïa ki nongwan kai sha ki jaka jngohkai ha ka District, kumta ka long kaba donkam ban shim lypa ïa ki lad jingïada na ka bynta ka jingshngaiñ jong baroh.
U la ong ba katkum ka kyndon 34 (m) jong ka Disaster Management Act, 2005, la pynkup bor ïa u ban bthah ha ka ban khang khyrdep shwa ïa baroh ki jaka jngohkai hapoh ka District.
U la pyntip ba ka jingkhang ïa ki jaka jngohkai kan treikam naduh ka 31 tarik Jymmang tad haduh ban da pynmih da kawei pat ka hukum.
