Shillong, Jylliew 01
U Mahesh Kumar Aggarwal, Additional Director General (ADG) ka Border Security Force (BSF) Eastern Comma-nd, u la pynkut noh ïa ka jingwan jngoh kaba 4 sngi jong u ïa ka Jylla ha ka Sngi U Blei.
Ka jingthmu jong kane ka long ban khmih bniah ïa ka jinglong ba la khreh ha ka liang ka jingtreikam bad ki jingpynbit-pynbiang ïa ki lad jingïada ha shi lynter khappud jong ka India bad Bangladesh.
Ha kane ka jingwan jngoh, u Aggarwal u la leit jurip ïa katto-katne ki Border Outpost (BOP) kiba don ha West Jaiñtia Hills bad East Khasi Hills, ha kaba u la ïakynduh bad ki shipai BSF kiba don ha ki jaka ba kyndong bad ba don jingeh.
U la ai khublei ïa ki shipai namar ka jingaiti lut bad jinglah shah jong ki ban ïaleh pyrshah hapdeng ki jaka kiba eh bad ki jinglong -jingman suiñ bneng ki bym tikna.
Na ka liang u Inspector General (IG) ka BSF Meghalaya Frontier, u O.P. Upadhyay, u la pynshai sha u ADG halor ka jinglong-jingman jong ka jingshngaiñ kaba mynta, kynthup ka jingtehlakam ïa ki kam khaïi tuh ba dang shen, ka jingphah shipai shuh, bad ka jingïatreilang bad ki bor synshar paidbah.
U ADG u la khmih bniah ïa ki buit ba la shim ban tehlakam ïa ka jingwan rung be-aiñ bad ki kam khaïi tuh ha shilynter u pud u sam ba lait rynghang, da kaba kdew ïa ka jingjop jong ka BSF ha ka ban pynpulom ïa ki kam runar na shiliang-sha-shiliang khappud.
Haba kren sha ki ophisar ha Frontier Headquarter, u Aggarwal u la ban jur halor ka jingdonkam ban pynkhlaiñ ïa ka jingpeitngor, ka jinglong ba tbit, bad ka jinglong skhem ha ka jingmut-jingpyrkhat.
U la pynpaw ruh ïa ka jingdonkam jong ki ‘Civic Action Programme’ ka BSF ban kyntiew ïa ka jingïadei bad ki nongshong shnong khappud.
Kum shi bynta jong kane ka jingwan jngoh, u ADG u la lum ïa ki jingïalang ba kongsan bad ki heh ophisar na ki bor synshar paidbah bad pulit ka Jylla ban pynkhlaiñ ïa ka jingïatreilang hapdeng ki tnad treikam na bynta ka jingpynïaid kam kaba paka ha ki jaka khappud.
Shuh shuh u la ïakynduh ïa u Lat ka Jylla, u Chandrashekhar H. Vijayashankar, ha Raj Bhavan, ha kaba u la ïathuh lyngkot halor ka jinglong-jingman ka shong suk shong shngaiñ kaba mynta bad ki sienjam kiba la shim da ki shipai BSF ha shilynter u pud u sam bar-ri.
