Guwahati, Jylliew:
Ka jingshlei um kynsan kaba la mih na ka jingtuid jong ka wah Sigin ka la pynthut ïa ka jingim jong palat 100 tylli ki longïing ha Upper Subansiri distrik jong ka Arunachal Pradesh, la ïathuh ki tyllong khubor na kane ka thaiñ.
Kane ka jingshlei um ka la ktah jur ïa ki katto katne ki jaka, kiba kynthup ïa ka Sigin-I, Sigin-II, Sigin-III, Sinyik Colony, Polo Colony, Tikre Colony, bad ki sawdong sawkun jong katei ka jaka tep.
U Dosh Dasi, u Secretary HRD jong ka Tamin Welfare Society, u la pynpaw ba bun ki nongshong shnong kiba la shah pynkynriah jaka ki la wad jaka rieh sha kiba haïing hasem jong ki.U la kdew ba ki bor synshar kim pat lah ban ai jingïarap mardor. U Dasi u la kdew ruh ba donkam ïa ka jingpeit bniah kaba pura ban tip haduh katno ka jingshah pynjulor ha ki ïing ki sem bad ki jingri jingdup.
Halor kane ka jingshlei um, ka bor synshar distrik ka la pynmih ïa ka jingbthah paidbah kaba kyntu ïa ki nongshong shnong ba kin long kiba husiar ha ka por ba jur slap. Ki heh sorkar ki la ai jingmut ïa ki briew ban kiar na ki jaka ba shlei um, ban sah hapoh ïing ha ka por basniew bha ka jinglong ka suiñbneng, ban kiar na ki nar pynïeng saikar ilektrik bad ki Power Line ban ïada na ka jingshah ktah na ka bording, bad ban ym pyrshang ban ïaid lait ïa ki wah ne ki wahduid ha ka por ba jur slap. Ki la maham ruh ban leit shajan ki jaka ba lah ban twa khyndew bad ki jaka ba lah ban ngam jyllop.
