Shillong, Jylliew 01
Ka Khasi Student’s Union (KSU) ha ka 30 tarik Jymmang, 2025 ka la leit ban ïakynduh bad aiti da ka jingthoh sha ka Myntri ba dei khmih ïa ka Tnad Law ka Sorkar Jylla, Dr. Mazel Ampareen Lyngdoh ban tuklar lem haba ïadei bad ka jingpynïaid bad jingdonkam bakla jong u Prof. Indrajit Dube uba dei u Vice-Chancellor jong ka National Law University, Meghalaya (NLUM) ïa ka pisa ka tyngka jong katei ka Skulbah.
Kane ka jingleit jong ka seng ka dei hadien ka jingïoh pdiang ïa ka jubab ïa ki jingkylli lyngba ka Right To Inform-ation (RTI) haba ïadei bad ka rukom pyndonkam bakla jong utei u Vice-Chancellor ïa ka pisa jong ka Skulbah.
Ka KSU lyngba u General Secretary, Bah Donald Thabah ka la ong ba ha ka 25 tarik Rym-phang, 2025, ka Seng ka la pynbeit ïa ki katto katne ki jingbym ïahap ha ka jingpynrung kam sha kiba bun ki dkhot jong ka Dorbar Synshar jong ka NLUM kiba ki dkhot jong ki, ki long ki nongbishar ba donburom jong ka Meghalaya High Court, ki ophisar na ka Sorkar Jylla, u Vice Chancellor bad kiwei kiwei ki nongïashim bynta, ha kaba ha ka Dorbar bah jong ki ba la pynlong ha ka 26 tarik u Rymphang, 2025 ki la ïakren ïa ki jingeh bad ki rai bad la ai jingbthah ïa u Vice Chancellor hynrei da ka jingsngewsih kaba khraw, utei u Vice Chancellor um shym la shim ïa ki lad ki lynti ban pynbeit ïa kaba la pynpaw sha ka seng hadien ba la ïoh ïa ki jubab RTI.
“U Prof Indrajit Dube u la pynïaid ïa ka NLUM ha ka rukom synshar donbor, da kaba thung nongtrei ïa kino-kino kiba don ka jingïajan bad da kaba kyntait ïa ki nongwan thepkam kiba don ïa ka jingtbit kiba dei na ka Jaitbynriew trai ri trai muluk bad um don ka jingsngewtynnad ïa ka jingroi jong ka NLUM hynrei tang ha ki jingmyntoi ba shimet jong u. Katto katne na kiwei pat kiba la shah thungkam hikai ka dei ha ka jingleh shiliang khmat namar ki dei ki bahaïing bahasem jong ki katto katne ki heh sorkar,” ong u Bah Thabah.
U Bah Thabah u la ong ba lyngba ka RTI, ka seng ka la lap ruh ba u Prof. Indrajit Dube u ju leit sha Delhi, Kolkata bad kiwei kiwei ki bynta jong ka Ri ha ka jinglut jingsep jong ka Skulbah da kaba bynrap ba wat kitei ki jingleit jong u kim don satia ïa ki kot ki sla kum ki shithi khot sngewbha ne kino-kino ki kot ki sla kiba thikna ba ki dei ki jingleit kiba ïadei jong ka Skulbah hynrei ki dei ki jingleit jong u shimet.
“Katkum ka RTI, ka la pynpaw ba naduh ba la sdang ïa ka NLUM ha u snem 2023, u Prof Indrajit Dube u la pynlut T.15.10 lak ha ki jingleit jong u kaba kynthup ïa bai ki tiket liengsuiñ, ka jaka sah, ka bam, bad kiwei kiwei, kiba bun na kine u shim ba ki dei ki jingleit jngoh shimet jong u, kumta ula pynlut kai ïa ka pisa shimet jong ka Sorkar Jylla na ka bynta ka jingmyntoi jong u,” ong u Bah Thabah.
Shuh-shuh, katkum ka RTI la lap ba u Vice Chancellor u dei hok ban ïoh ïa ka bai sumar bad bai lutksan ha ka leit ka wan bad ka bai sah tang na ka bynta ki kam kiba ïadei bad ka Skulbah bad ka seng ka la ong ba ka la ïohlum ruh da ki spah tylli ki resit bam jong u kiba kot da ki lak tyngka.
Ka seng ka tip ba ka jingbam ka long kaba donkam hynrei ka dei ban don ka jingbuh kyndon ne ka jingbuh pud ïa ka. Katkum ki resit ba ka seng ka la lum, ka pyni ba u Prof. Indrajit Dube u pynlut bun ha kaba bam ha ki jaka bam ba rem dor, ban dih ïa u kophi na ‘Starbucks’, bad kiwei kiwei, bad baroh ki bai bam pat la siew da ka Sorkar Jylla,” ong ka seng.
Ka seng ka la kdew ruh ba katkum ka RTI, ka NLUM ka la pynlong ïa ka jingïalang na ka bynta ka “Climate Investment Coalition for the Global South” ha ka 20 tarik u Rymphang, 2025 ha Delhi bad ka mang tyngka baroh kaba la antad na ka bynta kane ka prokram la antad ba kan long T.25 lak tyngka.
“Ka seng kam don jingartatien ha kaba ïadei bad ki prokram bad ka jingpynlut kaba la pynlut ha ki, hynrei ka seng ka pynrem ïa ka pisa jong ka Jylla kaba la pyndonkam na ka bynta ki jingdih buaid. Katkum ka bai dih kyiad, la ïohi ba la pynlut ïa ka pisa kaba kumba T. 3,56,750 ha ki jingdih buaid da u Prof. Indrajit Dube ha ka por ba long katei ka prokram. Kane ka jingpynlut bad ka jingpynsyrwa kai ïa ka pisa ym dei ban siew kylliang ïa u da ka Sorkar Jylla,” ong ka seng.
Da kaba kynnoh ruh ba ka la don ka jingpynlut palat ha ki jingtei IT ban ïa kaba kyntiew ïa ka pule puthi, u Bah Thabah u la ong ba ka NLUM ka duna ïa ki nonghikai ha ki sobjek bapher bapher hynrei u Vice Chancellor um pyrshang ban pynmih ïa kano-kano ka jingpynbna na ka bynta ka jingpynrung kam ïa ki nonghikai hynrei u la pynmih pynban ïa ki bill kiba la thied ïa ki tiar kiba ym don jingmut.
Shuh shuh, u Bah Thabah u la kynnoh ruh halor ka jingthung kam be-aiñ bad ka jingai tulop be-aiñ da u Vice Chancellor ïa u Prof. of Practice, Prof. of in Residence, Associate Professor in Residence, Research Fellow, Post-Doctoral Fellow bad kiwei-kiwei.
“U Prof. Indrajit Dube da la ka jong ka mon u la thaw ïa ka First Statutes, 2023 bad u la ai ha lade ïa ka bor ban thung ïa uno-uno u briew khlem kano-kano ka rukom treikam hynrei tang ha ka jingsngewbit jong u, kaba la ailad ïa u ban pyndonkam bakla ïa kane ka bor na ka bynta ki kam bamsap”, bynrap u Bah Thabah.
Ka seng ka la wad jingtip lyngba ka RTI ha kaba ïadei bad ki kynta ai jinghikai, ki jingïalang, ki klas ai jinghikai bad kiwei kiwei ba la leh da u Prof. jong ka Practice hynrei ym shym la don ki jingthoh kiba lah ban ïoh namar ba kim ju shim ïa kino-kino ki klas.
“Kane ka dei ka kam bamsap bad jingpyndonkam bakla ïa ki samla pule bad ïa ki tyngka jong ka Jylla bad ïa kane yn nym lah ban iehnoh khlem kano-kano ka jingpynshitom,” ong u Bah Thabah.
