Shillong, Jylliew 01
Ka shlem treikam jong u District Sports Officer (DSO) East Khasi Hills kan sdang noh ïa ki lympung ïalehkai District Level Inter School Subroto Mukherjee Cup Football Tournament 2025 mynta ka Lah Sngi U Blei ha kane ka nongbah.
Kane ka shlem treikam kan sdang shwa da ar tylli ki kyrdan ïalehkai, kita ka Under-15 (boys) bad ka Under -17 (girls) ha Madan Heh Mini Stadium kaba ha Mawlai Phudmuri, katba ïa ka Under-17 (boys) yn sdang ha ka 4 tarik ha madan ïalehkai jong ka SAI Training Centre kaba ha NEHU.
Ha ka Under-15 ki shynrang ki la don 16 tylli ki skul ki ban ïashim bynta naduh ka pre-quarter final. Te kumta ka jingïakhun pre-quarter ha ka Lah Sngi U Blei kin long hapdeng ka Assam Rifles pyrshah ïa ka Govt. UPS Mawryngkneng ha ka por 10 baje mynstep, kumjuh ka Don Bosco HSS ïa ka Seven Huts HSS (11AM), ka St. Antony’s HSS ïa ka Rairiat Aijingshai SSA&UPS (12PM) bad ka Hill Crest HSS ïa ka Shillong Vidyalaya SS (1PM).
Ha ka Under-17 ki don tang 7 tylli ki skul ki ban shim bynta. Te kumta ka jingïakhun kan long hapdeng ka Mawngap DCM HSS pyrshah ïa ka Hill Crest SS ha ka por 3 baje janmiet bad ka Govt. UPS Mawryngkneng ïa ka Sacred Heart Boys HSS (4PM).
Ha kane kajuh hi ka sngi yn sdang ruh ha West Jaiñtia Hills ha kaba ïa ki jingïalehkai yn pynlong ha Kiang Nangbah Stadium, Dongmihsngi Ladthadlaboh, Jowai bad ha Wahïajer Multi Sports Complex kaba ha Wahïajer.
