Shillong, Jylliew 01
U Dr. Jemino Mawthoh uba dei u General secretary ka United Democratic Party (UDP) Sengkmie u la phah shithi ban iehnoh kam (resign) na ka United Democratic Party (UDP) hadien khyndai snem ba u la bat kum u General Secretary.
Ïa kane ka khubor ba la phah shithi ban iehnoh na ka UDP la ïoh jingtip mynha ka Sngi Saitjaiñ hynrei katkum ka shithi u Dr. Jemino Mawthoh u la soi ha ka 20 tarik Jymmang 2025.
Ha kane ka shithi kaba u la phah sha u President ka UDP, Bah Metbah Lyngdoh, u la thoh ba un weng noh ïa ka jinglong dkhot na ka UDP bad ban iehnoh ïa ka shuki General Secretary na ki daw shimet.
Ha kane ka shithi u la ai khublei ïa ka UDP namar u la ïoh ban long kum u MLA, u la shah jied ban long kum u Working President naduh u snem 2014 bad General Secretary naduh u snem 2016 haduh ka sngi ban phah shithi iehnoh kam.
Ha kajuh ka por u la pyntip ba u la iehnoh ruh ïa ka kam kum u nongaibuit ha ka Planning Investment Promotion and Sustainable Development Department jong ka Sorkar Jylla.
Ka jingkylli mynta ka long, la ka UDP kan pdiang ne em ïa katei ka shithi ba la phah da u Dr. Jemino Mawthoh bad lada ka pdiang ïano yn thung bujli?
Ki khubor ki ïathuh ba ka UDP ka lah ban pdiang ïa katei ka shithi namar kane ka jingphah shithi iehnoh kam u Dr. Jemino Mawthoh ka dei kaba la dep rai la kham slem hynrei ki daw kiba shai yn sa paw pyrthei ynda ki nongïalam UDP kin sa ai jingpynshai sha ki nongkyrshan bad ka jingpynshai na u Dr. Jemino Mawthoh.
