Nongstoiñ, Jylliew 01
Ka Khasi Students’ Union (KSU) West Khasi Hills District Unit, ha ka 31 tarik u Jymmang lyngba ka General Election kaba hynñiew ka la ïoh biang ïa ki nongkitkam kiba thymmai na ka bynta ka samoi treikam jong u snem 2025-2028.
Ïa katei ka jingïalang pynskhem bad jied ïa ki nongkitkam ba thymmai la ïoh ban pynlong hapoh Bishop Hall Nongstoiñ ha kaba la wan ban ïashim bynta da baroh ki Unit bad Circle jong ka seng na kylleng ka district ha kaba u Bah John Fisher Nongsiang u la shah jied biang kum u President ba thymmai na ka bynta ka samoi treikam jong u snem 2025-2028, u Bah John Milton Wahlang kum u Vice President, Franklinroy Syiemïong kum u General Secretary, Robinestar Nongrem Assistant GS, Cooperfield Khardewsaw Education Secretary, Wanbha Kupar L Nonglait Organising Secretary bad kiwei kiwei.
Ïa kitei ki nongkitkam ba thymmai jong ka seng la ïoh ban pynskhem bad pynbam smai da u President ka KSU Sengkmie u Samla Lambokstarwell Marngar ha ryngkat ka jingïadonlang ruh ki nongïalam ka KSU Sengkmie, u Rangbah Dong ka dong Spengthawlangmlah jong ka New Nongstoiñ u Bah G Syiemlieh, ki nongïalam barim ka KSU WKHD, ki nongïalam ka FKJGP WKHD bad kiwei kiwei kiba la shah khot sngewbha.
U samla Lambokstarwell Marngar, President ka KSU Sengkmie, u la ong ki shalyntem jong ka por ki la nang ïai tyllun naduh u snem 1978 haduh kane ka khyllipmat ha kaba ka KSU ka la kynjoh mynta sha u mawmer ba 46 bad sa tang kumba 3 snem kan sa dap 50 snem. Lada ngi pyrkhat ïa kita ki snem ba ka jingsan bad jingheh jong ka KSU ha ka bri u hynñiewtrep baroh kawei sngew kumba ka la long mar shiteng ïa ka jingim briew hynrei lada peit pat ïa kata ka jingeh jong ka jaidbynriew ka sngew ba ki dang duna palat kita ki snem.
“Dei halor kata ka nongrim ka seng ka ju pynlong doh pynlong snam ïa ki kyntien kiba ong ba ki nongïalam ki leit bad ki wan hynrei ka nongrim jong ka KSU ka neh haduh kane ka khyllipmat kaba mynta,” ong u samla Lambokstar.
Shuh shuh, u la ong ba ha ki snem kiba kham mynshwa la ju don ruh kiba kynnoh ba ka KSU ka donkti bad kata ka seng kieng atiar bad la don ruh kiba ong ba la dei ban kheiñ seng kai khlaw bad kheiñ seng beaiñ noh ïa ka KSU.
“Nga sngew ban ong ba naduh ba la suit la shor ïa ka KSU bad haduh kane ka khyllipmat kaba mynta, ngi don kata ka jingngeit ba ki dkhot ka KSU ki dei ki lehnoh ka bri u hynñiewtrep kiba shu shakri hok na ka bynta ka imlang ka sahlang bad na ka bynta ka ri bad ka jaidbynriew baroh kawei,” ong u samla Lambokstar da kaba u la bynrap bad pynkynmaw da kaba ong ba ka kyrdan nongïalam kam dei ka pansngiat hynrei ka kyrdan nongïalam ka dei ka kamram.
U la kren ruh halor ka ILP da kaba ong ba ka Sorkar Jylla ka la dep ban mynjur ïa ka ‘resolution’ bad ka la phah sha ka Sorkar India hynrei kumba ka long mynta ka Sorkar India teng-teng ka ju thew pyrshah ïa ka bri u Hynñiewtrep. Ha ki juk ba mynshwa ngi la shah thombor da ki kuli bad ki ktang suloi hynrei ha kane ka juk ba mynta ngi shah thombor da ki aiñ ba khyllah khyllah ïa kaei ka aiñ ba ngi dawa bad pan ban ïada ïa ka jaidbynriew la sdang ban pynslem bad leh da kumne-kumtai, bad ka la dei ka por ba kum ki samla ngi hap pyrkhat thymmai ha kaba ngin ïai long ki nongpeitngor ïa ka jingwan rung ki mynder shapoh ka bri u hynñiewtrep baroh kawei.
