Mawkyrwat, Jylliew 01
U MLA ka Mawkyrwat Konstitwensi, Bah Renikton Lyngdoh Tong-khar ha ka 31 tarik u Jymmang, 2025 u la ïoh ban pyllait paidbah sa ïa ka MLA skhim ba ar kaba kot baroh sha ka T.2.50 klur lyngba ka Special Rural Works Programme (SRWP) jong u snem 2024-25 ha ka jingïalang kaba la long ha ophis treikam jong ka UDP ha Mawkyrwat.
Kumba ju leh manla u snem bad khnang ban pynthikna ba ka pisa paidbah kan paw haba shit ba shai khlem kano-kano ka jingbuhrieh sha ki nongïoh jingmyntoi, u Bah Renikton u la jer ïa baroh ki skhim bad ki kyrteng jong ki nongïoh jingmyntoi ha ka flex kaba u la pynpaw paidbah.
Ha kane ka kynti ba mynta u Bah Renikton u la ïoh ban pynmang kyrpang ïa ki skhim na ka bynta ban ïarap ïa ki ‘riewshimet kiba kot baroh 1090 ngut ban pynmaramot ïa ki longïing kiba la jot kumba 268 tylli ki longïing mar T.20,000 tyngka, ïa ki nongrep 602 ngut mar T.15,000 tyngka bad ki tin sop ïing sha 200 tylli ki longïing mar-mar lai ban.
Nalor ki jingïarap ïa ki ‘riewshimet, u Bah Renikton Lyngdoh u la ïoh ruh ban pynmang skhim ïa ki seng bapher bapher kumba 32 tylli na ka bynta ki jingpyntrei ïa ki skhim bapher bapher ha manla ki shnong kiba kynthup ïa ki jingshna ïa ki kamra klas jong ki skul, ki madan ïalehkai, ki Multipurpose hall, ki lynti ïaid kjat, ki pung um dih, ki paiñkhana na ka bynta ki skul, ka check dam, ki surok, ki jaka ïeng kali, ka jingker, ki jaka ap kali bad kiwei kiwei.
Ha kane ka juh ka sngi, u Bah Renikton u la ïoh ban pyllait paidbah ruh ïa ka Ambulance ne ka kali kit nongpang kaba dei lyngba ka MLA skhim na ka bynta ban ai ka jingshakri ïa ki paidbah jong ka konstitwensi baroh kawei.
U Bah Renikton Lyngdoh haba ai jingkren u la pynpaw ïa ka jingkmen ba kum u nongmihkhmat ha ka por ka jinglong MLA u la lah ban pyndep hok ïa la ka jong ka kamram kata ban pyndep ïa ka jingsam ïa ki skhim paidbah baroh san snem ha ka por kaba biang bad u ngeit skhem ruh ha kane ka kynti ba mynta ha ryngkat ka jingïatreilang bad ki ophisar un lah ban sam pyndep ïa ka MLA skhim sha ki paidbah ha ka por kaba biang.
Ha kane ka sngi la ïadonlang u Bah I Lawriniang, Block Development Officer (BDO) jong ka Mawkyrwat C&RD Block, u President ka Mawkyrwat People’s Development Association (MPDA), Bah SK Budnah, u Secretary ka MPDA, Bah Phrangkupar Syiemïong, u President ka UDP Mawkyrwat Circle, Bah Shainkor Nongsiej, Bah Jeslanroy Nongsiej, kiwei kiwei ki ‘riew rangbah bad ki paidbah kiba dei ki nongïoh jingmyntoi.
