Shillong, Jylliew 01
Ka Seng Khasi Raid Laban ka pynrem jur ïa ka jingpynriam bakla ïa uwei u nongjngohkai pyrthei uba dei u shynrang briew, uba la riam ïalade da ka riam tynrai jong ka riam kynthei kumba la paw ha ki rynsan ‘social media’ ha kine ki taïew ba la dep.
Ha ka kyrwoh khubor ba la pyllait da u Bah Skhemborlang Kharmawphlang uba dei Cultural Secretary ka Seng Khasi Ri Raid Laban, u la ong ba lehse une u briew uba na kawei ka jylla u bym tip, yn nym lah ban kynnoh ïa u, hynrei ki nongpynriam ki la dei ban tip kano ka riam shynrang bad kano ka riam kynthei, ym dei ban ai riam kat kaba ki mon ne ban shu pynïaid ïew tang ban ïoh pisa. Ki kynthei Khasi jong ka jaidbynriew ki don la ka nongkynti ka riam kiba ki ju pyndonkam manla ka sngi, katno tam ka riam kaba ka jaidbynriew ka ju pyni ïa ka riam khamtam kiba ïadei bad ka riam Shad Tynrai kiba kit ïa ki jingmut jong ka riti ka dustur ban pynriam khongpong ïa ka riam jong ki kynthei sha u shynrang briew ïa kane kaba ym lah ban pdiang.
U Bah Skhemborlang u la ong, kane ka jingriam une u briew ka pynhiar dor ïa ka riam ka rup jong ka jaidbynriew, une u briew u da phong ka pansngiat ha ka khlieh ryngkat u ‘tiew lasubon. Ko phi ki nongpynriam to da tip ba ka jingmut ka Pansngiat ka thew ïa ka jinglong sotti ksiar kaba khuid, ryngkat ka maiñ ksiar ka maiñ rupa ïa ka riti ka dustur jong ka jaidbynriew kaba kup ba phong ha ka riam shad shi rong.
Shuh shuh haba batai bniah u la ong, u kynjri tabah uba pynïadei ïa ki ar dur ar kyrdan jong ka longkmie bad ka long Meikha ban shai ha ka Longkur bad ban skhem ha ka Long Meikha. Ki ksah kti kiba pyni ïa ka burom bad ka sien syntiew ïa ka kyrdan longbriew jong ki naduh ba la rympei ïing haduh khmat ka pyrthei ryngkat ban kit ïa ka Hok ksiar ka Hok rupa bad ka Muhu Rupa pat ka pyni ïa ka maiñ kynthei ha ka longïing ka longsem ryngkat ka jingïadei ha ka imlang ka sahlang ban ri ïa ka akor ka burom.
“Dei na kine ba ngi kum ka jaidbynriew ngi ñiew burom ïa ki kynthei bad kum shynrang ngin long ki nongïada ïa ki, hynrei kine ki jingpynriam bakla ka wanrah ïa ka jingthad burom ïa ka riam ka beit jong ka jaidbynriew,” la ong u Bah Skhemborlang bad bynrap ba ka jingwanrah ïa ka riam ka beit tynrai jong ka jaidbynriew ka wanrah ruh ka jingaikam ka jingaijam ha kum kane ka por kyrduh kam, khamtam ha kito ki jaka kiba bun ki nongwan jngohkai pyrthei ki ju wan bha.
U la ong, lada pyndonkam bakla ka wanrah pat ka jinglehraiñ ïa ka jaidbynriew bad pynpaw ruh ba kane kam dei ka sien kaba nyngkong bad ka la jia teng ha ki por ba mynshwa bad lada kumne shi kumne kan ïai jia, la dei ka por ban dawa pynduh syndon ïa kane ka jingpyni riam bad lada donkam pat dei ban aiti ha kiba tip thikna bad kiba nang ban pynriam.
