Kuala Lumpur, Jylliew 01 (UNI)
Ka kynhun MP jong baroh ki seng saiñ pyrthei ka India ha ka Sngi U Blei ka la ïakren bad ki nongmihkhmat na ki lad pathai khubor ba pawkhmat ka Malaysia bad ki nongpynmih khubor lyngba ki rynsan lad pathai.
Ki la pynsngew ruh sha ki shaphang ka jingthmu jong kane ka jingwan jngoh jong ki da kaba pynleit jingmut ha ka ban ïakhun pyrshah ïa ki kam lehnoh ha baroh ki rukom bad kumno ka ri ba marjan jong ki – ka Pakistan, ka ïarap ïa ki kynhun lehnoh.
Kane ka kynhun hapoh ka jingïalam u Sanjay Kumar Jha ha kine ki jingïakynduh bad ki nongmihkhmat na Malaysia ka la pynsngew ïa ka jinglong-jingman kaba thymmai jong ka New Delhi, kata ka jingbym pdiang satia ïa ki kam lehnoh.
Kane ka kynhun ka la kynmaw burom ruh ïa ka nong Malaysia kaba la duh noh la ka jingim na ka jingshah thombor ha Mumbai ha u snem 2008 (ki jingthombor 26/11) bad pynsngew ïa ka jingma kaba lah ban mih na ki kam lehnoh pyrshah ïa u khun bynriew.
Ha kane ka jingïakren, ka kynhun ka la ïakynduh ïa ki nong India kiba don ha Kuala Lumpur bad pynsngew ïa ka nongrim bad ka jingïeng skhem ka India pyrshah ïa ki kam lehnoh.
Ki la ai jingtip ruh sha ki nongïashim bynta halor ki kam lehnoh na shiliang-sha-shiliang khappud kiba la ktah ïa ka India ha kine ki phew snem ba la leit, khamtam haba ïadei bad ki kam thombor ba shyrkhei ha Pahalgam, Jammu & Kashmir ha kaba 26 ngut ki briew ki la shah siat ïap ha ka 26 tarik u Ïaïong, ong uwei na ki dkhot ka kynhun.
Ha kane ka jingïakren, la kdew ruh halor ka jinglong-jingman bad ka tynrai jong ka ‘Operation Sindoor’ bad ka polisi ba skhem ka India ban ïakhun pyrshah ïa ki kam lehnoh.
La pynshlur ruh ïa ki dkhot nong India kiba shong ba sah ha kane ka jaka ban ïasam ïa ka khubor ha kylleng ki shnong bad ki rynsan. Ka jingïakren ka la khring ïa ki sur jong kine ki dkhot nong India, kynthup ïa kito na ka imlang-sahlang kiba dei ki Muslim (Malaysian-Indian), kiba la pynrem jur khlem jingartatien ïa ki jingthombor lehnoh na shiliang-sha-shiliang khappud.
Ki dkhot jong kane ka kynhun ki la kynmaw burom ruh ïa u Netaji Subhas Chandra Bose, u ‘riew pawkhmat ha ka jingïakhun laitluid ka India ha Netaji Subhas Chandra Bose Indian Culture Centre (NSCBICC) kaba ha Brickfields.
Kane ka kynhun ki seng saiñ pyrthei ka la ïakren ruh bad u shipai ba la rim jong ka Indian National Army (INA), u S.P. Narayanasamy, uba la don bynta lang bad Balak Sena jong ka INA.
Ka kynhun ka la ai khublei ruh ïa u Narayanasamy na bynta ka jingïatylli jong u pyrshah ïa ka jingma na ki kam lehnoh.
U MP ka Trinamool Congress, Abhishek Banerjee u la pynleit jingmut ïalade ha ka jingïakren kaba sngewtynnad bad kaba shemphang bad ki dkhot nong India kiba don ha Kuala Lumpur.
Shuh shuh ka kynhun ka la leit jngoh ïa ka Torana Gate ha Brickfields, Kuala Lumpur, u mot sahnam uba pyndonburom ïa ka jingïadei paralok kaba neh hapdeng ka India bad ka Malaysia.
Na ka liang ka kynhun kan ïakynduh ruh ïa ki Myntri ka Malaysia, ki dkhot jong ka Ïingdorbar Parliament, ki nongmihkhmat jong ki seng pyrkhat, ki ‘riewstad, ki lad pathai khubor bad ka imlang-sahlang ki nong India ban pynsngew ïa ka jingïasngewthuh jingmut jong ka India bad ka jingkut jingmut lang ban ïakhun pyrshah ïa ki kam lehnoh la ki long ha kino-kino ki rukom.
