Aizawl, Jylliew:
Ka Myntri ka Koit ka Khiah ka Jylla Mizoram, ka Dr. Lalrinpuii ka la pynbna ha kine ki khyndiat sngi ba la leit ba ki hospital sorkar shen kin sa sdang ban bujli ïa ki dkhot met, ha kaba kane kan long ka sienjam na ka bynta ki rukom ai jingsumar ba bha tam ha ka jylla.
Ka la pynpaw ïa kane haba plie ïa ka jaka peit bniah ïa ka koit ka khiah khlem jingsiew na ka bynta ki nongthoh khubor ha Aizawl Civil Hospital, ka jaka sumar sorkar kaba heh tam ha ka jylla.
Shuh shuh ka la ïathuh ba ka Aizawl Civil Hospital kan sa sdang noh shen ban pynkylla ïa ki snier, namar ba ka Hospital ka la dep ban buh ïa ka jaka sumar ba la buh kyrpang bad ka la ïoh ruh ïa ka License kaba donkam na ka sorkar pdeng.
Ha kaba sdang, ki Surgeon na shabar ka jylla Mizoram kin leh ïa ki Surgery Transplant katba ki dang hikai ïa ki kynhun sumar na ka thaiñ ban shimti ïa ki rukom sumar ha ki por ban wan.
Ka la kdew ba watla kum kine ki jingsumar ki ju shongdor haduh 8 lak ha ki hospital shimet, ka ZMCH kan ai ïa ki ha ka dor ba la ai jingïarap kaba long kumba 1.5 lak, kaba pynduna shibun ïa ka jingkit kaba khia ha ka liang ka pisa tyngka jong ki nongpang.
Haba pynpaw ïa ki jingpynkylla ha ka koit ka khiah, ka Lalrinpuii ka la ïaroh ïa ka skhim sumar pang jong ka Mizoram (MUHCS), kaba la sdang ha ka 1 tarik u Ïaïong.
Ka la kyntu ïa ki longïing ki bym ïoh tulop bad ki bym trei sorkar ba kin pynrung kyrteng hapoh ka MUHCS ban ïoh ïa ka jingsumar pang ba shisnem kaba T.5 lak na ka bynta kawei ka longïing. Ka jylla ka la wanrah ruh ïa ka rukom phah sumar kaba suk ban ïarap ïa ki nongpang ban ïoh suk ïa ki jaka sumar ba la buh kynhun shabar ka jylla Mizoram.
Hapoh ka MUHCS, ki nongïoh jingmyntoi kiba la pynrung kyrteng ki ïoh ïa ka jingsumar khlem da siew pisa ha ki hospital sorkar, ki hospital ba la pynrung kyrteng ha ki hospital shimet, bad ki hospital ba la pynïaid da ka balang.
Ki nongïoh jingmyntoi ba kyllum ki lah ban jied hapdeng T.2,500 na ka bynta ka jingïoh rung sha ki ward ba kyllum, T.5,000 na ka bynta ki ward shiteng shimet, lane T.10,000 na ka bynta ki ward shimet man la u snem.
Ki nongtrei sorkar, kynthup ïa ki nongtrei kontrak bad ki nongtrei Muster-roll, ki dei ban noh synñiang man la u bnai naduh T.200 haduh T.1,500, katkum ka tulop jong ki, ban ïoh ïa ka jingsumar kaba khlem pud.
Ki nongïoh penshon paidbah ki noh synñiang hapdeng T.500 bad T.1,000 shibnai ban ïoh ïa ka jingïada kaba shongdor T.5 lak haduh T.12 lak na ka bynta ki Ward shimet bad shiteng riew shimet.
Ka jingpeit bniah ïa ka koit ka khiah khlem jingsiew na ka bynta ki dkhot jong ka Mizoram Journalist’ Association (MJA) ka la sdang biang ha Aizawl Civil Hospital ha lah sngi U Blei, kaba bteng ïa ka rukom ai jingkyrshan ha ka liang ka koit ka khiah ïa ki nongtrei ha ki lad pathai khubor.
U President ka MJA u Lalrambuatsaiha u la ai jingkren ha katei ka jingïalang, kaba la kynthup ïa kiba bun ki nongthoh khubor, ki doktor, bad ki nongtrei jong ka hospital.
