Shillong, Jylliew 01
Wat hadien shiphew sngi kynthih, ba ki ar ngut kiba dang shu dep ïathoh shongkurim kiba na Indore ki la jah rngai hynrei haduh mynta ym pat lap dien satia ïa ki shano ki don. Kine ar ngut ki long u Raja Raghuvanshi (30 snem) bad ka Sonam Raghuvanshi (27 snem) kiba la wan kai sha Sohra.
U Raja bad ka Sonam Raghuvanshi ki la wan poi sha Meghalaya ban lehkmen ïa ka jingsdang jong ka jingim kum ki shi kurim bad ki la poi ïuh kjat ha Nongriat ha ka 22 tarik Jymmang. La ong ruh ba la ïohi khatduh ïa ki ha ka 23 tarik Jymmang hadien ba ki la mih na ka jaka sah ryngkat bad u nongïalam lynti. Shi sngi hadien, la lap ïa ka arshaka hajan Sohrarim bad naduh kane ka sngi haduh mynta ym pat tip satia shano ki don.
Kane ka jingjah rngai kynsan-kynsan ka la wanrah ïa ka jingleit wad kaba jur ban lap dien ïa ki bad ha kaba la pyndonkam palat spah ngut ki briew kiba kynthup ïa ki pulit, ka kynhun jong ka SDRF bad kumjuh ïa ki trai nongshong shnong ban leit wad ïa kine ki shikurim kiba la jah. Nalor kane la pyndonkam da ki K9 Sniffer Dogs bad ki Drones ban lap ïa kitei ha ki jaka kiba jynjar ban poi.
Ha ka 22 tarik u Jymmang kine ki shikurim ki la poi ha ka shnong Mawlakhiat (Elaka Mynteng) da kawei ka arshaka kaba ki la shu wai ban leit kai sha Double Decker Root Bridge ha Nongriat. Ki la ïalam ryngkat ïa uwei u nongïalam lynti ne u Local Guide u Bah Wansai bad ki la ïaid kjat 3000 tylli ki mawkyndon kiba noh ban poi sha ka jaka kaba pawnam ka Living Root Bridges kaba don ha Nongriat, ha kaba ki la sah shi miet ha ka Shipara Homestay kaba don ha Nongriat, la pyntip ki ophisar.
Ki la mih noh ha ka por 6 baje mynstep ha ka 23 tarik u Jymmang ban leit phai biang sha ka shnong Mawlakhiat. Hynrei ym shym la don mano-mano ruh ki ban ïohi ba kine ki shikurim ba kin ïaid kjat na Nongriat sha Mawlakhiat ne ban leit shim ïa ka arshaka kaba don ha ka jaka pynïeng kali ha Mawlakhiat, wat hapdeng ka jingjur jong ki nongwan jngohkai. Ha ka 24 tarik u Jymmang u Sordar jong ka Sohrarim u la pyntip shaphang ka arshaka kaba la shu wan buh bad la ïoh jingtip shaphang kitei ki shikurim lyngba ka E-Challan ha ka 25 tarik u Jymmang.
Halor kane ka jingbym pat lah ban lap dien, na ka liang u hynmen jong u Raja, u Vipin Raghuvanshi u la buh jingkyrpad sha ka Sorkar Kmie ba kan phah noh da ki pulit bad ki shipai na Delhi ban kyrshan lang ïa kane ka jingleit wad ïa kitei shikurim.
Haduh mynta ym pat ïohi dak eiei, wat la na ka liang jong ki pulit ka Meghalaya ki la trei shitom bad wat ban buh jingma ïa la ka jingim da kaba hiar sha ki riat ki ram ban leit wad ïa kitei shikurim.
