United Nations, Jylliew:
Ka United Nations ha kane ka por ka la pynkhreh ban pynduna ia la ka mang tyngka kaba $3.7 billion da 20% bad ban pynsangeh noh kumba 6,900 tylli ki kam jong ka kiba ka ju pyniaid baroh shi katta namar ka jingbym biang ha ka ioh- ka kot bad ka jingmih jong katei ka tnat.
Kane ka jingbthah, kaba pan na ki nongtrei ban batai bniah ïa ki jingpynhiar dor haduh ka 13 tarik u Jylliew, ka wan hapdeng ka jingeh ha ka liang ka pisa tyngka kaba la pynmih shi bynta da ka ri America, kaba man la u snem ka ai pisa haduh shi bynta na ka saw bynta jong ka pyrthei.
Nalor ka jingpynsangeh jong ka U.S. ïa ki jingïarap shabar ri ha ka jingsynshar jong u President Donald Trump kaba la pynduhjait ïa ki tnat ai jingïarap jong ka U.N, ka U.S. ka don ram – na ka bynta ki ram ba sahteng bad ha une u snem mang tyngka mynta haduh $1.5 billion.
U nongthoh jong katei ka memo, U.N. Controller, u Chandramouli Ramanathan, um shym la kdew ia ka jingbym lah siew jong ka U.S. U la kdew ba ki jingpynkylla ki dei shi bynta jong ka jingbishar bniah ba la sdang ha u bnai Lber ba la ai kyrteng ka “UN80.”
Kane ka jingpynsangeh treikam kan sdang treikam naduh ka ka 1 tarik u Kyllalyngkot, ka jingsdang jong ka mang tyngka ban wan.
Ha ki jingïakren paidbah sha ki nongmihkhmat jong ka U.N. mynta u bnai, u Secretary General jong kane ka tnat- u Antonio Guterres u la ong ba u dang pyrkhat ïa ka jingpynkylla kaba khraw ka ban pynïasoh lang lane ban iatreilang bad ki tnat ba kham heh. U la ong ba ka U.N. ka lah ban pynïasoh lang ïa ki katto katne ki tnat, ban pynduna ïa kiwei pat, ban pynkynriah ïa ki nongtrei sha ki nongbah kiba kham paw bad ban pynduna ïa ka jingpynkylla dur bad ban pynduh noh ïa ka jingtreikam ba palat pud.
Haba iadei bad kane, la ong ba ka sorkar jong u Trump ka la weng noh da ki spah million tyngka na ka pisa ba la buh kyrpang, kaba la pynbor ban pynsangeh kynsan ïa ki phew tylli ki prokram ai jingïarap ïa ki briew, ha kaba ki heh ka U.N. ki la pyntip ba kane kan wanrah ia ka jingduh ia shibun mynsiew briew ba kordor.
