Shillong, Jylliew 02
Ka Central Recruitment Board (CRB) jong ki pulit ka jylla Meghalaya ka la leh da kaba tyngeh ïa ki katto-katne ngut ki nongïakhun kam pulit ïa kiba la lap ba ki leh tuh ha ki eksamin ba dang shu dep na ka bynta ki kam bapher bapher. Kane ka long hadien ka jingjia ba dang shen ha kaba uwei u nongïakhun uba na East Jaiñtia Hills u la shah weng noh shi syndon.
Ha ki jingjia ba dang shu dep shen, la pynlong ïa ka jingthoh test na ka bynta ka kam Firemen ha ka 31 tarik Jymmang 2025, wat hapdeng ka jingbthah kiba shai halor ki kyndon eksamin, uwei u nongïakhun ïa kane ka eksam uba don ïa u Roll No 33002444 u la pyndonkam da ki lad ki lynti ki bym hok ha kawei ka jaka thoh eksam ha Eastern West Khasi Hills District, da kaba pynkheiñ ïa ki jingbthah bad ki kyndon thoh eksamin.
Ka CRB ka la pynbna ïa kane ka kam “Kaba lah ban pynrem bad bym lah ban shah” bad kumta ka la weng noh ïa une u briew na ka kam thoh eksamin bad kumjuh la khang shi syndon ban ïashim bynta ha ki eksamin thung kam pulit ha ki por ban wan.
La pynlong ïa ka jingthoh test na ka bynta ki kam AB/BNC/MPRO/GD/Constable Handyman ha ka 1 tarik mynta u bnai. Ha kane ka eksam 2 ngut ki nongïakhun kiba don ïa u Roll No 22049407 bad 22022738, la pyntip ba ki dei kiba la leh tuh ha ki jaka thoh eksamin ha East Jaiñtia Hills. Ïa kine ki briew kiba leh tuh ha ka eksam la khang ruh na ka jingïashim bynta ha ka kam pulit ha ki por ban wan baroh.
Kine ki jingleh ki wan hadien ka jingjia kaba kum kane ha kaba uwei u nongïakhun kam na East Jaiñtia Hills uba don ïa u Roll No 33032220 u la shah weng noh shirta namar ba u la pyndonkam ïa ki lad ki lynti ki bym hok ha ka por ba pynlong ïa ka jingthoh test na ka bynta ka kam Driver Fireman ha ka 31 tarik u Jymmang 2025.
Ha ka kyrwoh khubor, u Inspector General of Police [SB/Bdr] cum Chairman ka CRB, u Dalton P Marak, u la ban jur ba kum kine ki kam leh bym hok ki long kiba lah ban pynrem bad bym lah ban shah ha ka Transparent Recruitment Process (TRP) ba la bud ryntih da ki pulit ka jylla Meghalaya.
