Guwahati, Jylliew 02
Ka Assam bad Meghalaya ki la mynjur ban aiti ha ka North Eastern Space Applica-tion Centre (NESAC) ban pynlong ïa ka jingwad bniah ha kaba ïadei bad ka jingshim dur na u ‘Satellite’ ban tehlakam ïa ka jingshlei um ha Guwahati.
Ïa kane la pyntip da u Myntri Rangbah ka Meghalaya, u Conrad K. Sangma hadien ka jingïalang hapdeng ki Myntri Rangbah (Meghalaya bad Assam) kaba la long ha ka Lah Sngi U Blei ha Guwahati.
Ka jingïalang ka la ïathir halor lai tylli ki mat ba kynthup ïa u pud u sam hapdeng ka Assam – Meghalaya, ka jingtyrwa ban pyntreikam lang ïa ka projek pynmih bording bad jingpyntuid um, bad ki lad ki lynti ban weng ïa ka jingeh haba ïadei bad ka jingshlei um ha sor Guwahati.
Ka kynhun na Meghalaya ka kynthup ïa u Myntri ka tnad kam jngohkai pyrthei, Bah Paul Lyngdoh, Chief Secretary, Bah D.P. Wahlang lem bad kiwei-kiwei ki heh ophisar.
Na ka liang ka Assam, ka kynhun ka kynthup ïa u Myntri Rangbah ka Assam, u Himanta Biswa Sarma, ki para Myntri lem bad ki heh ophisar.
Halor ka mat kaba ïadei bad ka jingshlei um ha Guwahati, u Myntri Rangbah ka Meghalaya, u la pyntip ba baroh ar tylli ki Jylla ki la mynjur ban bynshet kam ha ka North Eastern Space Application Centre (NESAC) ban pynlong ïa ka jingwad bniah ha kaba ïadei bad ka jingshim dur na u ‘Satellite’ jong ki jaka khlaw bapher-bapher bad ban aiti ïa ka kaiphod hapoh lai bnai.
“Ngi la rai ban leit sha ka NESAC ban ïaid shakhmat bad ka jingwad bniah ha kaba ïadei bad ka jingshim dur na u ‘Satellite’ (baroh kawei), la ka long jong ki jaka khlaw, ka jingtuid um, bad ki jaka bapher-bapher jong ka jinglang um. Shisien ba la dep ïa kane ka jingwad bniah baroh kawei ha ki khyndiat bnai ban wan, ngin sa kynjoh sha ki tnad treikam kum ka IIT-Roorkee ban nang pynjanai shuh-shuh, bad hadien, ban phiah ïa kata ka jingbishar bniah sha ki sienjam ba shisha kiba ngi lah ban shim ban wad ïa ka lad kaba lah ban pyntreikam bad ka ban long ruh ka jingmyntoi ïa baroh ar tylli ki Jylla,” u la ong.
Haba ïadei bad kane ka mat – jingshlei um ha Guwahati, u Sangma u la pynpaw ka jingsngewkhia halor kumno baroh ar tylli ki Jylla kin ïatreilang ban wad ïa ki lad ki lynti ha ka ban pynduna ïa ka jingshlei um ha ka sor Guwahati bad ruh ban wad ïa ki sienjam ban weng ïa ki jingeh jong ki paidbah ha ka liang ka Meghalaya, ha kaba ki briew ki ïadon bynta ha ki kam ba ïadei bad ka ïoh ka kot bad ka kamai-kajih.
Shwa kane, u Myntri Rangbah ka Assam, Himanta Biswa Sarma u la pyntip ba ka Sorkar Assam ka la phai khmat sha ka komiti ka Supreme Court ha kaba ïadei bad ka jingtih ïa ki lum ha Meghalaya, bad la kynnoh ruh ba kane ka jingleh ka la wanrah ka jingdap bad shlei um ha Guwahati.
Haba kren sha ki lad pathai khubor ha Dergaon ha Golaghat distrik, u la ong ba lada ka jingtih ne pynmadan ïa ki lum ka dang ïai bteng ha Meghalaya, ka Guwahati kan sa kylla long kum ka duriaw.
“La ka dei ha Guwahati lane ha kiwei ki nongbah kiba heh, kan ym don satia ban lah ban khang ïa ka jingshlei um kaba pura. Manla u snem, ngi pyndap ïa ki jaka ba thylli bad tei ïa ki ïing paki,” u la ong.
Haba kynnoh ïa ka jingpynngat ïa u lum ha Meghalaya na ka bynta ka jingshlei um ha Guwahati, u la ong, “Kham mynshwa, dei tang ka jingleh ka USTM. Dang shen, nga la ïohi sa ar tylli ki ïing paki kiba dang tei da kaba pynmadan ïa u lum ha Meghalaya.”
Dang mynshem snem, u Myntri Rangbah u la ong ba ka daw jong ka jingdap bad shlei um jong ka Guwahati ka dei na ka jingleh jong ka University of Science and Technology, Meghalaya (USTM), da kaba kam ba ka um kaba tuid sharum na ka Campus, kaba don halor u lum marjan bad ka nongbah Guwahati, ka la wanrah ka jingshlei um kaba jur katta-katta.
Shuh shuh u Sarma u la ong ba la dep ban aiti ïa ka aplikeshon da ka Sorkar Jylla hakhmat ka ‘Empowered Committee’ jong ka Ïingbishar Supreme Court, da kaba kyntu ban jurip ïa ki lum.
