Shillong, Jylliew 02
Ki Nongïalam ka A’chik Conscious Holistically Integrated Krima (ACHIK) ha ka Lah Sngi U Blei ka 2 tarik u Jylliew, 2025 ki la leit ban ïakynduh bad ban aiti da ka dorkhas sha u Lat ka Jylla, u CH Vijayashankar ban pynsngew halor ki jingdawa ba kongsan jong ka thaiñ Rilum Garo na ka bynta ban wanrah ïa ka roi-ka par kaba kynthup bad kaba ïaryngkat lang bad ka jylla Meghalaya baroh kawei.
Ha katei ka dorkhas, ka seng ka la ban jur ïa ka jingdonkam ban pynbna ïa ka Tura kum ka Nongbah Tlang ne ka ‘Winter Capital, ban pyntreikam noh ïa ka Inner Line Permit (ILP) khnang ban tehlakam ïa ka jingwan rung kyrthep ki briew nabar, ban pynbeit ïa ka aiñ riti dustur jong ki paidbah ka Rilum Garo bad ka thup kyrteng jong ki nongthep vote na ka bynta ka GHADC, ban pynbun ïa ka pisa na ka bynta ka Captain Williamson Sangma State University nalor kiwei-kiwei ki mat jingdawa.
Haba kren sha ki lad pathai khubor, u General Secretary ka ACHIK, Adam R Sangma u la ong, ka jingdawa ban pynlong Nongbah Tlang ïa ka nongbah Tura kam dei shuh tang ka mat jong ki sengbhalang hynrei ka dei ka mat jingdawa jong baroh ki paidbah nongshong shnong jong katei ka thaiñ.
“Kane ka mat jingdawa kam dei tang jong ka seng ne jong kiwei-kiwei ki kynhun sengbhalang hynrei ïa kane ka mat mynta baroh ki paidbah ki la ong ba ka dei ka mat jong baroh,” ong u General Secretary.
U la ong ba ka jingdawa ban pynlong ïa ka Tura kum ka Nongbah Tlang ka dei namar ka jingjngai jong ka na ka nongbah Shillong kaba wanrah jingeh shikat dei eh ïa ki paidbah nongshong shnong ka Garo, kumta ka long kaba donkam ban pynurlong noh ïa kane ka jingdawa.
”Da kaba pynlong ïa ka Tura kum ka Nongbah Tlang, ngi wanrah sha ki paidbah ba kin long kham jan bad ka jingsynshar paidbah,” ong u General Secretary.
Shuh-shuh, ka seng ka la dawa ruh ban pynheh noh ïa ka kad liengsuiñ Baljek bad pynbna ïa ka district bathymmai hapoh ka kyrteng Dadenggre ka ban pynïaphiah na ka West Garo Hills.
Na ka liang ki nongïalam ka seng ki la pynpaw ba ka Rilum Garo ka dei kaba la shah kyntait slem bha ha ka jingthmu pynroi kaba ryntih, kumta mynta ka angnud ïa ka jingpynbeit kaba dei hok lyngba ka jingïarap kaba don jingthmu bad kaba la pynïaid da ka polisi.
Ki la ong ruh ba ka seng ka la ong ba ki jingdawa jong ki, ka long kaba la pynshong nongrim bad ha ka jinglong mar ryngkat ha ka riti synshar, ka jingbishar hok ha ka thaiñ, bad ka synshar paidbah.
