Shillong, Jylliew 02
U Myntri Rangbah ka Jylla, Conrad K. Sangma u la ong ba ka Sorkar Assam bad ka Sorkar Meghalaya ki la mynjur ban sieh noh ïa ki mawpud ha ki jaka ba don hapdeng ka jingkajia pud hapoh ka 15 tarik u Nailar mynta u snem.
U Sangma u la ong ïa kane hadien ka jingïa-lang hapdeng ki Myntri Rangbah (Meghalaya bad Assam) kaba la long ha ka Lah Sngi U Blei ha Guwahati.
Halor kane ka bynta, u Myntri Rangbah u la pyntip ba hapoh ka 15 tarik u Nailar ban wan, yn sa sieh noh ïa ki mawpud ha ki hynriew tylli ki jaka ba don hapdeng ka jingkajia, kiba la dep ban pynbeit bad ba la dep ïasoi ruh ïa ka MoU.
“Ki don sa khyndiat tylli ki jaka ha Gijang bad Tarabari, kiba donkam ban pynbeit ha ka liang jong ka Meghalaya, ha shuwa ban pynïeng ïa ki mawpud,” u la ong.
“Ngi la jan bha ban pynkut noh ha ka ban sieh ïa ki mawpud bad nga sngewkmen ban pyntip sha phi ba kumno-kumno, hapoh ka 15 tarik u Nailar ne ha shuwa ka 15 tarik u Nailar, ngin sa lah ban pynbeit bad pynkut noh ha ka ban sieh ïa ki mawpud ba tikna ha ki 5 tylli ki jaka ba don hapdeng ka jingkajia (ha kaba la dep ban soi ïa ka MoU). Kane kan long u mawmer uba kongsan bad kawei pat ka sakhi kaba skhem jong ka jingïadei paralok bad ka Jylla Assam”, u la bynrap.
U la pyntip ruh ba ka jingïakren halor ki hynriew tylli kiwei pat ki jaka kiba dang sah kan dang bteng.
Halor ka ‘Kulsi Multi-Purpose Irrigation and Hydroelectric Power Project’, ki ar tylli ki Jylla ki la ïakren bad mynjur ban pyntreikam lang ïa kane ka projek, hadien ka jingïakren bad ki paidbah ba bun balang.
Ka dei ka projek pynlang um bad kaba pynmih bording ilektrik kaba heh.
“Ka Assam bad ka Meghalaya ha ki por ba la dep ki la pyni ba ngi long kiba plie ban ïakren halor ki mat bapher-bapher. Ki jingeh kin don beit. Ki jingtynjuh kin don beit. Kaba kongsan ka long ba ngi dei ban ïakren bad pyrshang ban wad ïa ki lad ki lynti ban weng ïa ka jingeh. Mynta ka sngi ka dei kawei pat ka nuksa jong kata ka jingkular kaba la pyni da ka Sorkar Assam bad ka Sorkar jong ngi, kumba la ong da u Myntri Rangbah ka Assam, haba ïadei bad ka projek jong ka Kulsi, ka dei ka projek kaba kdew shai ba ka long ka jingjop na bynta baroh arliang, la ka long ka jingpynmih bording, la ka long ka jingpynbiang um, ne la ka long ka jingpynroi ïa ka kam jngohkai pyrthei ha baroh lai tylli ki bynta bad kiwei-kiwei hapdeng baroh ar tylli ki Jylla,” u la ong.
Shuh shuh u la bynrap, “Ngi la rai ryngkat bad ka kyndon, hooid, ba ïa ki briew kiba sah ha kito ki jaka yn buh hakhmat eh ïa ki, yn sa ïakren bad ki, bad ngin wad ïa ka lad ban ïaid shakhmat kumno ngin leh ïa kane ka projek bad mynta ka sngi, ha ka nongrim, baroh ar tylli ki Sorkar ki la rai ban ïatreilang kum ka dak jong kane ka jingïadei paralok (Assam-Meghalaya) jong ngi ba ngin pyrshang bad pynïaid shakhmat bad kane ka projek, bad kaba kongsan eh ba ngi la rai ba ka kam kan sdang, da kaba sdang da kaba ïamir jingmut bad ki paidbah.”
