Nongpoh, Jylliew 02
Ar ngut ki nongñiah jong kawei ka arshaka (scooty) bad kawei ka scooter ki la ngat ha ka jingmynsaw hadien ka jingïatynrah para maki, kaba la jia ha Lad Umroi ha ka janmiet jong ka Sngi U Blei ha ka por kumba 5:05 baje eiei.
Katkum ka tyllong khubor ba la ïoh lum na ki pulit, la ïathuh ba katei ka jingjia ka dei hadien ba kawei ka Scooty Ntorq kaba la pynher sted katta-katta kaba don ïa u registration number ML05-AE-2887 kaba la ñiah da u Jerry Shylla ka la leit ban tynrah nadien jong ka Scooter kaba don ïa u registration number ML05-C-2331 kaba la ñiah da u Thymmaibor Rapsang.
La ïathuh ruh ba hadien katei ka jingjia, uwei pat uba shong lang hadien bad utei u Jerry Shylla, u la phet krad na katei ka jaka katba ïa kitei ki ar ngut ki nongñiah kiba la mynsaw, la pynkynriah noh sharud surok da ki briew shwa ban wan poi ki pulit bad hadien la pynkit pat sha Nongpoh Civil Hospital lyngba ka kali kit nongpang 108 ba la synran ryngkat da ki bahaïing bahasem.
Shuh shuh, ka khubor na ki pulit ka la ïathuh ruh ba ïa ka scooter kaba la pynsangeh sah ha katei ka jaka, la rah noh sha thanat Umïam na ka bynta ban buh bha bad ruh ban leh ïa kaba donkam katkum ki kyndon jong ka aiñ.
