Ka jingjah rngai jong ki shi kurim kiba dei na Indore ha Madhya Pradesh kiba dang shu dep ban ïathoh shong kurim dang shen hadien ba ki la wan shang pyrthei sha ka thaiñ Sohra, ka la long shisha kawei na ki khubor kaba la ïakren ym shuh tang hapoh ka jylla hynrei wat shabar ka jylla. Kane ka la pynlong shi syndon ïa ki lad pathai khubor jong ka Ri ban kloi kdew-kti bad ai dak sniew syndon ïa ka thaiñ Sohra, kaba dei kawei na ki jaka jngohkai pyrthei kaba itynnad bad paw bha ha ka pyrthei.
Ngi ai pat ka jingïaroh ïa ki pulit ka jylla kata naduh ki kynhun pulit wad bniah, ki State Disaster Response Force, Special Operation Team bad ka kynhun West Jaiñtia Hills District Adventure Mountaineering bad khamtam lei ïa ki trai shnong kiba wat hapdeng ka jingshah kynnoh, kiba la hiar bad trei shitom ban leit wad ïa ki shi kurim. Ngi la ïohi ba lyngba ka jingtrei shitom jong kine baroh khlem da kheiñ ïa ka jinglong jingman jong ka suiñ bneng bad ruh ban hiar ïa ki riat ki ram bad ki jaka kiba sohsat, ha kaba la lap ïoh ban sei noh ïa kawei ka metïap ïa kaba la pynthikna da ki bahaïing ba ka dei jong u Raja Raghuvanshi lyngba ka ‘tattoo’ bad kiwei ki tiar ba don ha ka met jong u.
Ïa ka metïap jong u Raja Raghuvanshi la lap da ki kynhun pulit kiba la ïohi ïa ki bynta jong ka kjat da kaba pynher ïa ka drone ha ka rait jong ka Weisawdong parking lot kata ha Riat Arliang ha ka por 11:48 mynstep hynrei ïa ka kurim jong u, ka Sonam Raghuvanshi pat ym pat lap satia. Kane ka pyni ïa ka jingtrei shitom jong ki pulit. Kumta ngi dei ban ai ka jingïaroh halor kane. Hooid watla haduh mynta ngim pat tip ïa ka daw tynrai halor ka jingïap jong utei u shynrang, la ka dei kaba u la hap hi sha riat ne shah leh sniew ha ki briew, hynrei tang ka jingtohkit ki pulit ka ban sa pynshisha halor kine kiei kiei baroh. Ngi donkam ba ka tnat pulit kan buddien bad tohkit bniah halor, khnang ba baroh kiei kiei kin shai kdar bad ruh ba ka nam ka burom jong ka thaiñ Sohra kan dang neh bad kiew arted. Ngi ïohi ba ha kine ki khyndiat sngi, ki lad pathai khubor jong ka Ri, ki la sdang ban ai dak sniew ïa ka thaiñ Sohra. Ngim tip la ka dei ka jingbakla ne leh khnang ne ka jingthmu jong kiba kwah ban pynhiar bad pynthohbria ïa ka dong ka thaiñ Sohra.
Wat la kum kine ki jingjia ki la jia la katto-katne sien, hynrei kam dei satia pat na ka jingshah leh sniew ne na kiwei ki daw bad ka dei beit na ka jingbym phikir bad long husiar hi jong ki nongwan kai. Ngi ïohi ba ki ju kwah ban leh shlur bad ban hiar hi ïa ki riat ki ram ban poi sha ki jaka kiba itynnad. Lada leh shlur khlem pyrkhat ka lah ban ïalam sha ka jingjia kaba sngewsih. Kumta ka long kaba donkam haba leit sha kum kine ki jaka khamtam ha kum kane ka aïom lyiur bad dum lyoh, dei ban pynthikna ban ïalam lang ïa ki trai shnong kum ki nongsynran bad nongpyni lynti. Ngi dei ban long kiba phikir bad husiar bha khamtam lei na ki jaka ba long riat namar ngim tip aïu kan jia lada ngi tur shajan ki bynta long riat ne haba ngi hiar sha ki bynta ba long sharing jong ki lum.
