Ka jingjied ïa ki kyrtong kan long ïa kiba don jingkyrmen ban jop: Marcuise

Shillong, Jylliew 02

U Working President ka National People’s Party (NPP) uba dei ruh u Myntri ka Sorkar Jylla u Marcuise N Marak ha ka Lah Sngi U Blei jong ka taïew u la ong ba ka jingjied ïa ki kyrtong sha ka ilekshon Garo Hills Autonomous District Council (GHADC) kan long katkum ka jingdon jingkyrmen ban jop.

Haba ïakren bad ki lad pathai khubor u Marcuise u la ong ba ka seng ka dang pynkhreh ïa ka jingpynkhreh na ka bynta ka ilekshon sha GHADC.

“Katto-katne na ki kyrtong jong ngi, ki la don lypa ban ïakhun ha ka ilekshon MDC sha GHADC,” la ong u Marcuise.

Haba ïadei bad ka jingïasoh dang shen jong 2 ngut ki MLA barim ryngkat bad ki nongkyrshan jong ki ha East Garo Hills, u Marcuise u la ong, “Katei ka dei ka jingpynshisha kumno ngi sdang ïa ka jingpynkhreh mynta”.

Haba kylli, u la ong, ka seng ka dang wad ïa ki kyrtong ban jop.

“Hynrei ngin sa rai ban ai ïa ki tiket jong ka seng katkum ka jinglah jong ki kyrtong ban jop,” u la ong.

U Working President u la ong ba ka seng kan pyrshang katba lah ban ïoh ïa ka jingjop kaba bun paid ha ka ilekshon GHADC ka ban sa long.

“Ngin sa leit sha ki paidbah bad ban pynpaw bad pynshai halor ka jingtreikam ka jong ngi kum ka seng ban pan ka jingkyrshan na ki,” u la pynpaw.