Gaza, Jylliew:
Kumba 26 ngut ki paidbah nong Palestine ki la duh ei ia ka jingim bad palat 80 ngut kiwei pat ki la mynsaw ha ka jingleit ther bom ka Israel hajan ka jaka sam jingïarap jong ka US ha ki thaiñ ka Rafah jong ka phang Shathie jong ka nongbah Gaza. Ki kynhun iarap na Gaza, ki la iathuh ba da ki hajar ngut ki nong Palestine ki la ialum lang hajan ka Al-Alam — hajan jong katei ka jaka ai jingiarap, kaba la pyniaid da ka Gaza Humanitarian Foundation (GHF)– ha ka Sngi U Blei, ha kaba ki tup jong ka Israel ki la wan shajan jong katei ka jaka bad ki la ther bom sha katei ka jaka ba ialum paidbah.
Hynrei ïa ki khubor halor kane ka jingshah thombor la kyntait da ki tyllong khubor kiba don ha ka Embassy jong ka Israel. Ka GHF ka la kam ruh ba ka jingsam jingiarap jong ka ha Gaza ka la iaid “khlem” kano kano ka jingjia bad ka la kyntait ia ki jingkynnoh jong ka Hamas ba ka Israel ka la leit thombor ia ki riew paidbah ha katei ka sngi.
U Myntri Rangbah-duh barim jong ka Israel, u Naftali Bennett, ha ka jingkren jong u hapoh ka rynsan X, ula kyntait ïa ki khubor ba kitei ki tup jong ka Israel ki la siat bad ther bom sha ka jaka ba don ki paidbah hajan ka jaka ai jingïarap ha Rafah. Ki khubor halor katei ka jingshah thombor ki la mih tang hadien ba ka United States ka la kyntait ïa ka jingtyrwa ban sangeh thma jong ka Hamas kum ka “bym lah ban pdiang”. Ia kiba mynsaw la rah sha Nasser Hospital, kawei na ki khyndiat tylli ki hospital kaba dang iai treikam hapoh Khan Younis.
Hadien katei ka jingshah thombor ha ka sngi U Blei, ka Hamas ka la kynnoh ïa ki shipai Israel kiba don ha ka thaiñ Rafah, ba ki long ki nongpyniap briew ba shyrkhei bad ki nongpyniap dusmon ia ki paidbah kiba don hapdeng ka jingkyrduh bam bad ka jingthgan kaba jur. Haba iadei bad kane, la ong ba ka Israel ka la mad ïa ka jingshah kynthoh kaba jur na ki ri ka pyrthei halor ka jingeh jong ki paidbah ha Gaza, ka nongbah kaba la shah pynjot thiaw ha ka thma jong ka Israel, ha kaba ka United Nations ka la maham ba ki nongshong shnong baroh kawei ka nongbah Gaza ki hap ban im hapdeng ka jingkyrduh bam namar ka jingkhang jong ka Israel ïa ki lad jingïarap ba nabar kiba dei ban pynpoi sha ki paidbah jong katei ka nongbah.
Ka GHF, ka seng shimet, kaba la kyrshan da ka Israel bad ka America, ka la sdang ban sam marbam ha Gaza Strip naduh ka 26 tarik u Jymmang, hadien ba ka Israel, ka la weng noh shi bynta ia ka jingkhang khyrdep, kaba la neh palat ar bnai. Hynrei ki kynhun ai jingiarap jong ka United Nations ki la kynthoh ruh ia ka rukom ai jingiarap jong ka GHF, da kaba ong ba ka pynkheiñ ia ki nongrim jong ka jinglong briew bad ka nang buh jingma arshah pynban. ia ki paidbah jong ka Palestine.
Ka United Nations bad kiwei kiwei ki kynhun ai jingïarap kiba heh ruh ki la kyntait ban ïatreilang bad ka GHF, da kaba ong ba ka pynkheiñ ïa ki nongrim ba kongsan jong ka jingïarap briew bad ka paw ba la shna khnang ban pyntreikam ïa ki jingthmu jong ka tnat shipai ka Israel.
