Kuwait, Jylliew:
Ka tnat pynlip ding jong ka Gulf State ha ka Sngi U Blei, ka la pyntip ba ka la don ka jingpluh ding kaba jur ha kawei ka iingsah briew kaba don sha ka phang Shathie Lam Mihngi jong ka nongbah Kuwait, ha kaba 5 ngut ki la khlad ha katei ka jingjia.
La ong ba ka ding ka la klang ha ki ar tylli ki jaka sah briew, kiba don ha ka thaiñ Rigga, kaba jngai kumba 10 kilomitar (6 mer) na ka nongbah, ong u nongaiktien u Brigadier General Mohammed al-Gharib.
Ha katei ka jingjia, ki kynhun pynlip ding ki la ioh sei ia 3 tylli ki metiap napoh jong kitei ki iing ba pluh bad sa 2 ngut pat ki dei kiba la khlad noh na ka jingjur ka jingmynsaw hadien ba la pynpoi ia ki sha jakasumar.
Katto katne ngut kiwei pat ki la mynsaw, bad u Gharib u la maham ba ka jingiap ka lah ban nang kiew shuh-shuh namar ka jingjur jong katei ka jingpluh bad dang don shuh shuh ruh kiba dang jah rngai hadien katei ka jingjia.
Ia mynta hi, la ong ba ki bor pyniaid ki dang pynlong ka jingtohkit kaba bniah halor ka daw jong katei ka jingpluh bad ki dang buddien ruh ban lap ia kitei kiba dang jah rngai hadien jong katei ka jingjia.
