Shillong, Jylliew 02
Ka West Khasi Hills District Chess Association (WKHDCA) ka la pynlong ïa ka lympung ïalehkai chess ba la tip kum ka 11st WKH District Chess Championship 2025 (Open Category) ha ka 31 tarik u Jymmang ha Nongstoiñ. Na kane ka lympung la ïoh ban jied 6 ngut ki nongïalehkai ban mihkhmat sha ka State Level Chess Championship 2025 ka ban long ha u bnai Jylliew mynta u snem ha nongbah Shillong.
Ïa kane ka lympung la wan plie da u MDC ka Nongstoiñ, Dr. Juristman Ïawphniaw kum u kongsan ha kaba u la kyntu ïa ki khynnah ba kin leh bha ïa kane ka jingïalehkai khnang ba kan ïarap ïa ki jingpule jong ki bad ba ka lawei kan long kaba jop.
La pynïaid ïa kane ka lympung da u Bah Toteinal L. Marshillong Senior National Arbiter da ka Swiss System.
Ha kaba kut jong ka wat kaba san, la ïoh ban jied 6 ngut ki nongjop kiba kynthup ïa u Lallomom Shyrkon, Bonney Kharbani, Ronyson Shyrkon, Brian CJL Marshillong, Ronaldwanbor Lyngkhoi bad u Andrew C. Gare. Ha ka prokram pynkut la ïadon lang u Bah Sahitbor Diengngan, Branch Manager kum kongsan u la ai jingkren bad sam ïa ki khusnam, ki syrnod, ki momento bad ai checkmate kum ka dak jong ka jingpynkut noh ïa kane ka lympung.
