Shillong, Jylliew 02
U Bah MB Kharlukhi uba dei u Myntri ba peit ïa ka pla tyngka jong ka Hima Mylliem, u la ïathuh ba ki kam hapoh Ïewduh ki dang don shibun ban pyntrei bad ban pynbha ïa ka, la ka long ki dukan, ki bording ban buh ha shilynter ka Ïewduh, ki jaka leit shabar bad kiwei kiwei.
Ka jingpynitynnad ïa ka Ïewduh mynta ka la sdang shaid-shaid ha ka ban siang da ki maw Sohra ha shilynter ka lynti ha Ïewduh bad ruh ka jingpynitynnad lyngba ki jingdro dur dro dar.
Kane ka jingsiang maw Sohra ha Ïewduh ka la sdang naduh kine ki bnai ba la dep bad haduh mynta, wat hapdeng ka jingther u ‘lapbah, ki dang pynïaid shakhmat ïa ka kam ban pyndep noh kloi.
Ha ka jingïakren bad u Myntri Kharlukhi ha ka Lah Sngi U Blei ka 2 tarik u Jylliew 2025, u la ïathuh ha kaba ïadei bad kane ka jingsiang maw Sohra ha Ïewduh, ka Sorkar Jylla ka la mang pisa kumba T.6 klur bad ka kam mynta ka la ïaid shaid-shaid shakhmat.
U la ïathuh ba dang ha kine ki taïew ba la dep u Myntri Rangbah ka Sorkar Jylla u Conrad K Sangma ryngkat u Symbud Myntri Rangbah Bah Prestone Tynsong ki la leit ban ïuhkjat bad ban jurip ha Ïewduh ban peit ïa ka jinglong jingman bad ki jingduna hapoh ïew khnang ban pynbha shuh shuh.
U la ong ba ka Sorkar Jylla ka la dep ban pyllait ïa ka pisa kaba 6 klur tyngka ban pynbha ïa ki lynti ïaid jong ki paidbah bad mynta ka Sorkar Jylla ka la pynkhreh ban pyllait sa kumba 15 klur tyngka ban pynbha ïa ki pipe um da kaba shna da ki tyndong ban pynïaid ïa ka um, ym ban shu pynïaid lyngkrang, nangta ka jingpynbha ïa ki nala bad kiwei kiwei ki jingdonkam hapoh ïew.
U Myntri u la ong ba hapoh ïew ki don bun ki bynta ban pynbha, ki don ki jaka ki bym don ïa ki nala, ki bym don ïa ki pipe um bad ïa kito ki jaka kin sa sdang ban pyntrei noh shaid-shaid. Ki CCTV ruh hapoh ïewduh ki dang donkam shibun ban buh, namar ka jingjia shah tuh jong ki paidbah kiba wan ïew ka ju ïai jia man ka por, u la bynrap.
Shuh shuh u Myntri u la pynpaw ka jingsngewtynnad bad ai burom ïa u Myntri Rangbah uba la kloi ban wan jurip hi dalade ha Ïewduh ban peit ïa ki jingdonkam ban nang pynbha ïa ka.
Nalorkata, u la ong ba naduh ba sdang shna pynbha ïa ka Ïewduh ban siang da ki maw Sohra, ki paidbah ki la ai ka jingïaroh bad pynpaw ka jingsngewtynnad haba ki wan sha Ïewduh namar ka la khuid la suba ban ïaid lynti ruh.
