Shillong, Jylliew 02
Ha ka jingwad bniah kaba la neh haduh phra sngi, ki pulit ka East Khasi Hills ha ka Lah Sngi U Blei ki la lap noh ïa kawei ka metïap kaba la pynthikna ruh ba ka dei jong u Raja Raghuvanshi. Ïa kane ka met, la lap na ka riat kaba don shapoh jong ka Weisawdong Parking Lot ha Riat Arliang.
Lah ban pynkynmaw ba ki shi kurim kiba na Indore ha Madhya Pradesh ki la jah rngai naduh ka 23 tarik mynshem bnai haba ki la wan kai sha ka thaiñ Sohra.
Ha ka kyrwoh khubor ba la pyllait da u Superintendent of Police ka East Khasi Hills, Bah Vivek Syiem, u la ong ba ha ka por kumba 11:48 mynstep, ka drone kaba la pyndonkam da ki pulit ka la lap ïa ka metïap, lyngba ka jingwad kaba ïatreilang hapdeng ki pulit, State Disaster Response Force (SDRF), Special Operation Team (SOT) bad ka West Jaiñtia Hills District Adventure Mountaineering Club.
U Bah Vivek Syiem u la pyntip, namar ka jingnoh bad jinglong riat ka jaka, ïa ka metïap la wanrah noh sha ka Parking Lot ha kaba la leh ïa ka Magisterial Inquest da ka Kong Adiel R Kynta, MCS, Executive Magistrate ka Sohra, ha ka por 3:30 bad 4:00 janmiet ha ka jingdonlang ki nongsakhi na ka thaiñ bad ki bahaïing jong une uba la khlad noh kiba la kam ba kane ka metïap ka dei ka jong u Raja Raghuvanshi lyngba ka tattoo kaba la don ha ka kti kamon, kaba thoh “Raja.”
U SP u la pyntip ruh ba na katei ka jaka kaba la lap ïa ka metïap, ki pulit ki la ïoh ïa kawei ka sopti kynthei kaba lieh, shi sla u Pentra 40, ka bynta jong ka LCD Screen jong ka Vivo mobile phone bad ka Smart Watch na ka kti jong une uba la khlad.
Ïa katei ka metïap la pynkit noh sha NEIGRIHMS, Shillong ban leh ïa ka post-mortem ban lap ïa ka daw tynrai jong ka jingïap.
Halor ka jinglap ïa ka metïap jong utei uwei napdeng ki ar ngut, ki pulit kim shym la kyntait ba ka lah ban don ka jingleh sniew bad ki la shim ïa kane ka jingjia bad suba jur ba ka dei ka jingshah pynïap bad kumta la thaw ïa ka Special Investigation Team (SIT) ban pynlong ïa ka jingtohkit kaba bniah ban lap ïa ka daw tynrai.
“Ym pat lah ban tip eiei shaphang ka kurim jong u Raja ka Sonam Raghuvanshi bad ki bor kiba dei khmih ki dang bteng ban wad ïa ka wat hapdeng jong ka jingpynthut jong ka suiñ bneng bad ka jinglong riat jong ka jaka,” la ong u SP.
U Bah Syiem u la ïaroh ïa ka jingtrei shitom jong ki kynhun kiba leit wad ne Rescue Team bad pynpaw ba ka jinglap ïa katei ka metïap ka dei lyngba ka jingïatrei kaba khlem shongthait wat ha ka jingmad ïa ki jingeh kiba bun.
U SP u la ong, ba yn sa ai shuh shuh ïa ki jingtip kham hadien katba ka jingtohkit ka dang ïaid shakhmat.
