Shillong, Jylliew 02
Ka lympung District Level Inter School Subroto Cup Football Tournament 2025 ha East Khasi Hills District ka la sdang ha ka Lah Sngi U Blei ka 02 tarik Jylliew 2025 ha Mawlai Madan Heh naduh ka por 10 baje mynstep. Ha ka Under-15 jong ki shynrang la sdang da ka jingïalehkai ba nyngkong hapdeng ka Assam Rifles Public School pyrshah ïa ka Govt. U.P.S Mawryngkneng. Ka Assam Rifles Public School ka la jop kput da 10-0 kol ha kaba u Lalhmingma Wia u la thep lai kol ha ka minit kaba 7, 19 & 25, u Thounaojam Jackson Singh (13, 17), u John Wandon Nongsiej (18, 32), u Irungbang Yaiphaba Meitei (11), u Lazarus Pohthmi (27) bad u John Vianney Pakma (35).
Ka jingïalehkai kaba bud hapdeng ka Don Bosco Hr. Sec. School pyrshah ïa ka Seven Hut Hr. Sec. School ka la kut ha ka jingïakhaid bad ha ka tie-breaker ka Seven Hut Hr. Sec. School ka la jop da 1-0 kol.
Ha ka jingïalehkai kaba lai jong kane kajuh ka sngi ha kajuh ka jaka, ka St. Anthony’s Hr. Sec School ka la jop da 3-1 kol pyrshah ïa ka Rairiat Aijingshai SSA L.P/U.P School. U Habankara Blah u la thep 2 kol ha ka minit kaba 15&37 bad u Letsemthang Kipgen ha ka minit kaba 49 na ka bynta ka St. Anthony’s Hr. Sec School katba u Mebanpynshngaiñ Khyriem u la thep shi kol na ka bynta ka Rairiat Aijingshai SSA L.P/U.P School.
Bad ha ka jingïalehkai kaba khatduh jong kane ka sngi jong ki shynrang U-15 ka long hapdeng ka Hill Crest Hr. Sec School pyrshah ïa ka Shillong Vidhyalaya Sec. School. Ka Shillong Vidhyalaya Sec. School ka la jop da 3-0 kol. U Dahun Pale u la thep ar kol ha ka minit kaba 11&35 bad u Bansuklang Kharmuti u la thep shi kol ha ka minit kaba 15.
Ha kane kajuh ka lympung ki la don ruh ki jingïalehkai na ka liang ki kynthei U-17 kaba la sdang naduh ka por 3 baje janmiet ha kane kajuh ka sngi ha Mawlai Madan Heh.
Ha ka jingïalehkai kaba nyngkong ka Mawngap D.C.M Hr. Sec School ka la pynliem da 2-0 kol ïa ka Hill Crest Sec School. Ka Narisha Khyriem ka la ïoh thep kol ha ka minit kaba 27 bad ka Lawanbha Kharbani ha ka minit kaba 37.
Ha ka jingïalehkai kaba bud, ka Sacred Heart Boys H.S School ka la pynliem noh ïa ka Government U.P School da 1-0 kol. Ka Eleen Kyntla ka la ïoh thep kol ha ka minit kaba 2.
