Shillong, Jylliew 02
U Myntri Rang-bah ka Jylla, Conrad K Sangma, u la hiar hi dalade ha ka Sngi Thohdieng sha madan jong ka SSA Stadium First Ground Polo ban jurip ïa ka jinglong- jingman jong kane ka stadium hi baroh kawei bad kaba dei artad kawei na ki madan ïalehkai kaba la rim tam ha kane ka jylla.
Kane ka jingleit jurip jong u Conrad ka long ba un tuklar lem ïa ki katto-katne ki kam kiba dang sah jong kane ka madan bad kumjuh u la ïoh ban ïakren bad ki dkhot nongkitkam ka SSA da kumno ban lah ban bteng biang ïa ka kam ban tei ïa ka jaka ban shong peitkai ki paidbah sha ka phang jong ka Wahumkhrah.
Haba kren bad ki lad pathai khubor hadien ba la dep ban jurip, na ka liang u Conrad u la pynpaw ba u la ïoh ïa ka jingud haba ïadei bad ka jingshna ïa ka nur ban pyntuid ïa ka um ne ka drainage bad kumba ka long mynta ka kam ka la sdang ban ïaid shakhmat ha kaba la tih biang ïa ki thliew na ka bynta ban thep ïa ki pipe um khnang ba kan tan noh ïa ka um.
Haba ïadei bad kane ka jingjurip, u Conrad u ïathuh ba la don lang u kontraktor ba pyntrei ïa ka kam kumjuh ki karikor jong ka State Sports Council of Meghalaya, ha kaba ki la kular hakhmat jong u ba hapoh phra ne khyndai sngi, ïa kane ka kam kin pyndep noh, khnang ba ka SSA kan lah ba kan sdang ïa la ka jong ka samoi ïalehkai kiba bun ki jong ka.
Sa kawei pat ka bynta kaba u Conrad u la pynpaw ka long ba ha kane ka jingjurip u la ïoh ïa ka jingbatai na ki nongkitkam ka SSA na ka bynta ban theh shuh-shuh ki kam pynroi kiba dang donkam ha kane ka madan. Kumba la kdew haneng ïa ka jaka ban shong peitkai ki paidbah ne ka master plan ban pynwandur itynnad shuh-shuh ïa kane ka stadium hi baroh kawei, khnang ba yn lah ruh ban lah pyndonkam lang ïa ka ha ka por ba pynlong ïa ka lympung jong ka National Games.
Kum ban shu pyn-kynmaw, na ka liang ka Tournament Committee jong ka SSA mynta ka sngi ka 2 tarik u Jylliew ka la thmu ba kan sdang ïa ka samoi ïalehkai jong u snem da ka jingplie pyrda ïa ka lympung ïalehkai jong ka 4th Division Football League, hynrei na ka daw ba ïa ka kyndong jong kane ka madan ka dang don hapdeng ka jingtih ban thep ïa ki pipe um, kumta, la rai ban pynsangeh noh shwa tad haduh ban da pyndep shwa ïa kane ka kam.
