Jowai, Jylliew 02
Ka lympung ïalehkai District Level Inter School Subroto Mukherjee Cup Football Tournament, 2025 ba la pynïaid da ka ophis u District Sports Officer, West Jaiñtia Hills ka la sdang ha ka 2 tarik Jylliew ha madan Kiang Nangbah Stadium Ladthadlaboh Jowai bad Wahïajer Multi Sports Complex, Wahïajer.
Ïa kane ka lympung ïalehkai la bynta sha lai tylli ki kyrdan ïalehkai, kita Under-15 ki shynrang, Under-17 jong ki kynthei bad shynrang.
Ha ka sngi sdang, ka jingïalehkai ka la long tang na ka bynta ka kyrdan Under-17 jong ki shynrang.
Ha ka jingïalehkai kaba la long ha madan Kiang Nangbah Stadium, ka Sawlyngdoh HSS Mowkaiaw ka la pynliem da 2-1 pyrshah ïa ka Jaiñtia Secondary School, Jowai. Ka Little Flower HSS Ummulong ka la pynrem ïa ka Lumpyrtuh Sec School, Mihmyntdu da 5-1 kol.
Ka Amwi HS School Thangbuli ka la pynliem da 4-0 kol ïa ka Tome Memorial HS School, Jowai. Katba ka HK.Singh Memorial Sec School, Jowai ka la pynliem da 3-0 kol ïa ka Khimusniang Presbyterian Sec School, Jowai. Ka Marian Hill HS School Jowai ka la pynrem ïa ka Mihmyntdu Sec School da 2-1 kol.
Katba ha madan Wahïajer Multi Sports Complex, Wahïajer, ka Albin Lamare Memorial Sec School, Nangbah ka la jop da 4-3 kol lyngba ka Tie breaker pyrshah ïa ka KJP Synod Mihngi HSS, Jowai.
Ka Laishnong HSS, Nongbareh ka la pynliem da 3-2 kol pyrshah ïa ka Adventist HSS, Khliehtyrshi. Ka Govt. Boys HSS, Jowai ka la pynliem da 3-1 kol pyrshah ïa ka Ummulong Presbyterian HSS.
Ka Kiang Nangbah HSS Jowai ka la pynliem kput da 7-0 kol pyrshah ïa ka On and On Sec School, Ummulong, katba ka Rising Hill Sec School, Mootyrshiah ka la jop da 5-4 kol lyngba ka tie breaker pyrshah ïa ka Khasi Pnar Sec School, Bakur.
