Florida, Jylliew:
Ka Brooke Anderson, 27 snem kaba dei ka nonghikai skul jong ka Riverview High School ha ka nongbah Florida, ka la shah pynngat kyndon aiñ hadien ba la lap ba ka ialeh khlemakor bad uwei u khynnah skul shwa ka por ban sdang skul. Katkum ki khubor, la iathuh ba ka Anderson ka la pynneh ïa ka jingïadei bad utei u khynnah la bun bnai. Kumta haba iadei bad kane, katei ka nonghikai ka la ngat 3 tylli ki jingshah pynrem bad ki kyndon pynkheiñ aiñ ba ka leh be-aiñ bad utei khynnah rit.
Ha ka step jong ka 16 tarik u Jymmang, la ong ba ka Anderson ka la ialeh khlemakor bad uwei u khynnah skul ha katei ka skul Riverview High School ha shwa ba kan shah kem noh shisyndon. Ka ophis jong ka Hillsborough County Sheriff ka la sdang ïa ka jingtohkit hadien ba la mih ki khubor halor ka jingïadei kaba long be-aiñ hapdeng katei ka nonghikai kaba la ju ithuh kum ka Anderson bad uwei u khynnah pule shynrang jong katei ka skul ba ka hikai. Une u khynnah pule u bym shym la pynpaw kyrteng, u la pyntip sha ki bor synshar ba ka jingïadei jong ki ka la sdang naduh u bnai Nailur 2024 da ka jingsdang shwa lyngba ki jingiakren na ki ‘message’ bad ka jingiakren hapdeng jong kine ka la poi shaduh u pud ban shong-kha bad kaba la nang khring ia kitei ar ngut ba kin poi sha kitei ki kam kiba long be-aiñ khamtam ia u khynnah uba dang don hapoh ka jingpule bad uba dang hapoh 18 snem ka rta.
Ka Anderson, ka dei ka nonghikai science ha ka Riverview High School, katkum ka jingthoh jong ki nonghikai skul paidbah ha Hillsborough County, hynrei la weng noh ia ka kyrteng jong ka na katei ka jingthoh tang hadien ba la kem ia ka.
Ka Anderson, ka la shah pynngat ha ki 3 tylli ki kyndon pynkheiñ aiñ kiba iadei bad ka jingleh be-aiñ jong ka bad utei u khynnah rit. Kumta ha ka sngi kaba bud la pyllait noh hadien ba u nongbishar u la buh ia ka bai jamin jong ka haduh $45,000, ryngkat bad $15,000 na ka bynta kawei-pa-kawei ka jingkynnoh. Ka skulbah ka la pynthikna ba ka Anderson ka dei ka nonghikai ba katei ka skul ka la peitbniah bha shuwa ban pdiang ia ka kum ka nonghikai jong katei ka skul.
Hynrei, ka skul kam shym poi pyrkhat ba kane ka nonghikai kan don ia kum katei ka jinglong kaba ijli haduh ba kam map shuh wat ia ki khynnah skul kiba la long kum ki khun jong ka bad kiba ka hap ban hikai bad pyni ia ka nuksa kaba bha.
