Shillong, Jylliew 02
Ki kam tuh kam thiem ki dang ïai bteng na kawei ka sngi sha kawei pat, kum ka jingshah prong tuh jong ki ïing ki sem, ki dukan, ka jingshah tuh ki arshaka bad kiwei-kiwei.
Katkum ka khubor na ki pulit la ong ba u Bah Hamiwell Marweiñ u la ai ka jingujor ba ha ka step jong ka 29 tarik mynshem bnai, ki runar bym lah ban ithuh, ki la tuh ïa kawei ka bicycle kaba shongdor haduh T.40,000/- na ka phyllaw ïing ka jong u kaba don ha Mawlai Mawroh, Shillong.
Ha kawei pat ka khubor, u Dinesh Rai u la ai ka jingujor ba ha ka 28 tarik mynshem bnai, ki runar bym lah ban ithuh, ki la prong tuh shapoh ka dukan ka jong u, kaba don ha Umsohsun, GS Road, Shillong bad ban rah tuh ïa ki mar duma kiba shongdor haduh T.45,000/-, ki kopi, ki let, ki khulom bad kiwei-kiwei ki tiar nalor ki pisa khutia nar kiba la rim bad ruh ka pisa kaba long T.75,000/-.
Ha kawei pat ka khubor, u Sotjeng Ch Marak u la ai ka jingujor sha ki pulit ba ha ka step jong ka 25 tarik mynshem bnai, ki runar bym lah ban ithuh ki la tuh ïa ki san tylli masi napoh ka sem jong u kaba don ha Bollongre ha West Garo Hills. Shuh shuh na ka liang jong une u nongujor, u la suba jur ba haduh saw ngut ki briew na Assam ki lah ban donkti ha kane ka kam.
