Shillong, Jylliew 02
U Myntri Rangbah ka jylla, Conrad K Sangma ha ka Sngi Thohdieng u la leit ai khublei bad kitbok ïa ka kynhun ïalehkai phutbol ka Meghalaya U-20 ki shynrang ban leit shah pyntbit da ka Elite Training Camp ha Olympique Lyonnias Training Academy, Lyon, ha France naduh ka 5-25 tarik u Jylliew 2025.
Haba ai jingkren sha ka kynhun ïalehkai kaba don 28 ngut, u Conrad K Sangma, u la ong ba ka Meghalaya ka don ïa ka kabu kaba khraw ha ka jingkhlaiñ jong ka jingbun ki samla bad ka sorkar ruh ka pyrshang ban pyndonkam ïa kane ka kabu da kaba bei tyngka ha ki prokram bapher-bapher kiba pynshong nongrim na ka bynta ki samla. “Haba poi kane ka jingthoh sha nga na ka bynta kane ka prokram nga la mynjur khlem artatien wat la ka jingpynlut baroh na ka bynta kane ka prokram ka long 2.80 klur namar kane ka pisa kam dei ka jingpynlut hynrei ka dei ka jingbei tyngka,” u la ong. Haba batai shuh-shuh ïa ka buit bei tyngka ha ki samla u la bynrap, “Lada don napdeng jong phi kiba ïoh ban rung sha ka ISL ha ki por ban wan, phin sa lah ban ïoh biang ïa ka jingbei tyngka kaba ngi la buh ha uwei-pa-uwei na phi ha kane ka prokram kyrpang tang ha kawei ka aïom jong ka ISL bad kumta nga ïohi ïa ka jingtreikam baroh kawei ban phah ïa kane ka kynhun sha ka Lyon France na ka bynta ka jingleit pyntbit kaba 20 sngi kaba long ka jingpynroi lypa ïa kane ka sap ha ka lawei na ka bynta ka jylla Meghalaya.”
U Myntri Rangbah u la ong ruh ba ka Jylla hadien khyndiat snem kan sa don kumba sanphew tylli ki madan artificial turfs ryngkat bad ka madan phutbol kaba heh tam ha ka Ri. “La ka long ha ka bor briew ne ka jingkyntiew bor ïa ki nongïalehkai ne ki jingtei kum ki madan ïalehkai bad ki madan ïalehkai phutbol ne ka jingkyrshan ïa ki klob bad ki seng ïalehkai phutbol ka dei ka bynta jong ka jingïohi jngai kaba kham heh kaba ngi don na ka bynta ka lawei jong ki samla jong ngi bad ka jylla,” u la bynrap shuh-shuh.
Haba ïakren bad ki nongïalehkai ki ban sa leit shah hikai, u la kyntu ïa ki ban shim khia bha ïa kane ka kabu bad ban ïai bteng ban pynleit jingmut bha. “Man la ka khyllipmat ba phi don hangta pynkynmaw ïalade ïa kane ka kabu kaba phi ïoh bad shim ïa ka wat ïa ka kabu kaba rit tam ban ïoh jinghikai ban long ka jingmyntoi, ban mad bad mlien bad ban ïasam bad ban ïoh mynsiem bad pynshlur ban ïaleh na ka bynta kaba bha tam,” u la ong.
Ha katei ka sngi la donlang ruh u Bah Richard Yangtham, Joint Secretary ka tnad ïalehkai bad ka tnad samla, u Saloni Verma, IAS, Executive Director ka MBMA, u Bah Hamlet Dohling President ka Meghalaya Football Association, u D.D Shira u Director ka tnad ïalehkai bad ka tnad samla nalor kiwei pat.
Ïa ka kynhun na ka bynta ka jaka ai jinghikai ban wan ha Lyon la lum bad thaw da ka jingïatreilang jong ka Directorate of Sports bad ka Meghalaya Football Association bad kane ka kynhun ka la ïaid lyngba ïa ka Coaching Camp kaba bniah bha ha madan SSA la shibnai tam bad ha ryngkat, la thaw ïa ka kynhun kaba la ïashim bynta ruh ha ka lympung ïalehkai jong ka U20 Nationals ha Chattisgarh ha kaba ka kynhun ka la ïalehkai bha haduh katta-katta ban poi sha ka semi final ha ka sien kaba nyngkong ha kane ka kyrdan ïakhun.
Ïa kane ka kynhun yn ïalam da u ‘rangïalehkai shadien, u Rimankhraw Kharumnuid kum kapten.
Kane ka jinghikai phutbol kaba la pynpaw pyrthei ha Lyon kaba la pynlong da ka seng ïalehkai Indo French Sports Association kan wanrah ïa ka jingshemphang bad jingmyntoi ryngkat shibun ki jingmyntoi bad ki lad ïoh jinghikai ha ka kam ïalehkai phutbol bad ïaid kham jngai shuh ïa kane ruh.
