Jowai, Jylliew 03
Ka lympung ïalehkai District Level Inter School Subroto Mukherjee Cup Football Tournament, 2025 ba la pynïaid da ka shlem treikam u District Sports Officer (DSO), West Jaiñtia Hills ka la nangjam shaphrang ha Kiang Nangbah Stadium Ladthadlaboh Jowai bad ha Wahïajer Multi Sports Complex, Wahïajer ha ka Sngi Ba-ar.
Te, ha ka sngi kaba ar jong ka lympung, la pynlong ïa ka jingïalehkai Under-17 jong ki shynrang ha Kiang Nangbah Stadium kaba ha Ladthadlaboh Jowai.
Ha kane ka jingïakhun, ka Mihmyntdu RC EVE SS ka la pynliem noh ïa ka Nongbareh Lyntiar SS, Nongbareh da 3-1 kol. Ka Govt. UP RMSA School Jowai ka la pynliem ïa ka Che’s Star HHS, Jowai da 2-0 kol. Ka St. Dominic HSS Mawkyndeng ka la jop da 4-3 lyngba ka tie-breaker pyrshah ïa ka Mukhla Raij HSS, Mukhla.
Ka Achievers SS, Ummulong ka la jop da 1-0 kol ïa ka Wahïajer Presbyterian SS bad ka Syiem Jingsuk HSS Amlarem ka la pynliem ïa ka Krist SS Namdong da 2-0 kol.
Ha ka jingïalehkai Under-15 jong ki shynrang kaba la long ha Multi Sports Complex, ka Jaiñtia SS, Jowai ka la pynliem kput da 6-0 kol ïa ka Jowai District Presbyterian SS, Ïalong. Ka Little Flower HSS, Jowai ka la pynliem da 3-0 kol ïa ka Seiñraij HSS Jowai. Ka Marian Hill HSS, Jowai ka la jop da 2-1 kol ïa ka All Saints Diocesan SS, Jowai.
Kumjuh, ka Amlarem UPS ka la khyrwit jem da 9-1 kol ïa ka Jowai Public School, katba ka Syiem Jingsuk HSS, Amlarem ka la jop da 6-5 lyngba ka tie-breaker ïa ka Mihmyntdu SS.
Kane ka lympung kan bteng biang ha ka sngi Balang na ka bynta ban pynurlong ïa ki jingjop bad ruh ban kynjoh sha ka thong namar ka jingangnud hi ka long ban rah ïa ka nam lahduh bad ruh ban mihkhmat ïa katei ka distict sha ka State Level Subroto Cup.
