Shillong, Jylliew 03
Ha ka Sngi Ba-ar ka 03 tarik Jylliew, ki pulit ka State Disaster Respond Force (SDRF), ki pulit NDRF, ryngkat ki pulit na ka Thanat Sohra, ki SOT, ki la sdang biang ban leit wad sa ïa ka kurim jong u Raja Raghuvanshi, ka Sonam Raghuvanshi kiba la jah rngai naduh ka 23 tarik u Jymmang 2025 ha Weisawdong. Kat haduh mynta ki pulit kim pat lapdien ïa ka kurim u Raju Raghuvanshi bad kin bteng biang ban wad la Sngi Balang.
Ïa ka Sonam ki pulit ki la leit wat biang ha kajuh ka jaka kaba ki la lap ïa ka metïap jong u Raju ha ka Sngi Ba-ar, ka 03 tarik Jylliew ha arliang riat marjan bad ka Weisawdong-Mawhasew. Ki pulit ki la sdang biang ban pynher da ki drone sha suiñ khnang ban lapdien ïa ka Sonam.
Ki pulit ki la hiar sha Arliang riat ban wad sa ïa katei ka kurim u Raju naduh ka por 10:30 mynstep bad wat la ki la pyrshang ban pyni ïa ki buit ki bor jong ki ban wat ïa katei ka longkmie, hynrei kim shem la lapdien satia haei ka don.
“Namar ka jingbymlap dien satia kumba katto-kattne kynta eiei ka jingwad ïa katei ka longkmie, na ka liang ki pulit ki la wan kiew biang sha jrong ha ka por kumba 1:30 nohphai sngi eiei.” Hapdeng ka jingwat jong ki pulit ha Arliang riat ïa ka Sonam, ka jaka ba lap ïa ka met jong u Raju, mynta ka sngi ki pulit ki la ïoh tam sa ïa ka wait bad ka mobile phone, tangba ym pat lah ban pyntikna ïa kine ki tiar ba ka don jingïadei ne em bad ka jingjia. Na ka liang ki pulit ki la rah noh ïa kine ki tiar ban tohkit shuh shuh.
“Hadien ka jingbym lapksai bad khlem ïohi eiei ïa ki dak ki shin ïa ka jingleit wad ïa katei ka kurim u Raju, ka Sonam ha Arliang riat, na ka liang ki pulit ki la leit ban wad sa sha AD-View Point, ka thaiñ Mawkma kaba jngai kumba 9 ne 10 kilometre eiei na ka jaka ba lap ïa ka met u Raju”.
Ka jinghiar ki pulit ban leit wat sa ha AD-View Point kadei hadien ba la ïoh jingtip ba kitei ki shikurim ki la hiar ban sangeh ïa la ka scooty ha katei ka surok kumba 2 minit eiei, bad ïoh lehse ki don ki dak ki shin ban lap dien ïa ka Sonam.
Mar shu poi ha katei ka jaka ki pulit ki la ngam sha ki khlaw jong ki arliang surok ban pynlong ka jingkhynra, khnang ban lap dien ïa ka Sonam, hynrei hadien ba ki pulit ki la peitbniah bad khlem lapdien eiei, ki la sangeh noh shwa ka jingwad ïa ka Sonam bad kin sa bteng biang ha ka sngi kaba bud.
Kum ban shu kdew hangne, ka Sonam bad u Raja Raghuvanshi ki dei ki shikurim kiba la wan honeymoon na Indore, Madhya Pradesh ban wan kai pyngngad bad kiba dang shu dep ïathoh shongkurim mynshem bnai bad ha ka jingwankai sha Sohra ha ka 23 tarik u Jymmang kine shikurim ki la jah rngai noh.
