Nongstoiñ, Jylliew 03
Ha ka Sngi Ba-ar jong ka taïew ka Sibsingh Memorial Government Higher Secondary School Nongstoiñ, ka la ïoh ban plie noh sa ïa ka Commerce Stream na ka bynta ka klas XI bad kumjuh ïa ka Arts Stream ha ka por mynstep ha kaba u MLA ka Nongstoiñ u Bah Gabriel Wahlang u la long kum kongsan.
Katei ka jingplie jong ka skul Sibsingh sa ïa ka Commerce Stream bad kumjuh ïa ka Arts ha ka por mynstep ka la long ka jingkyrkhu ïa ki samla pule ka dong ka thaiñ, khamtam ïa ki bym ïoh lad ban leit pule sha jngai bad ha kajuh ka por ka la long ruh ka jingkyrkhu ïa ki samla wad kam ka dong ka thaiñ.
U MLA ka Nongstoiñ u Bah Gabriel Wahlang u la ong ba ha ka jingshisha ka Commerce bad ka Arts mynstep ha Sibsingh ka la dei ban duh hynrei lyngba ka jingïatreilang jong baroh ym tang ma u kum u MLA, la lah ban pynïoh biang lyngba ka jingshimkhia u Myntri Rangbah ka Jylla u Conrad K Sangma ha kaba la ïoh ruh ban plie ha kane ka sngi.
Ha kane ka sngi nalor u MLA la ïadon ryngkat lang ruh u Bah H.K Thabah, ADC ka WKHD, ka Kong D Hoojon Principal ka skul Sibsingh, ki nonghikai, ki kmie ki kpa, ki khynnah skul bad kiwei kiwei.
