Shillong, Jylliew 03
Ka Committee on Environment ka ïingdorbar thawaiñ ka Jylla Meghalaya kaba la pynïaid da u Bah Wailadmiki Shylla, MLA ka Jowai ka la lum ïa ka jingïalang ha ka Jylla ha ka Lah Sngi U Blei jong ka 2 tarik Jylliew, 2025 ha ka Conference Room jong ka Main Assembly Building, Administrative Block, Shillong.
Ha kane ka sngi la ïadonlang ruh da ki dkhot ka committee kiba kynthup ïa u Bah Mayralborn Syiem, MLA ka Nongpoh, Bah Methodius Dkhar, MLA ka Mawshynrut, Bah Heaving Stone Kharpran, MLA ka Mawryngkneng bad Co-opted Member, u Dr. Wishming Ryngkhlem.
Ha kane ka jingïalang la ïashim bynta lang ruh da ki ophisar na ki tnat Sorkar kiba dei peit, ki bor synshar district bad na ka Secretariat jong ka ïingdorbar thawaiñ ka jylla Meghalaya.
Ka jingthmu ba kongsan jong kane ka jingïalang ka long ban bishar bniah ïa ka jinglong-jingman kaba mynta kaba ïadei bad ka mariang bad ka jingkylla ka suiñbneng ha kylleng ki thaiñ.
Saw tylli ki tnat Sorkar kiba kongsan ki la ai jingkren bniah hakhmat ka komiti: Na ka liang ka tnat Planning, Investment Promotion & Sustainable Development ka la pyni halor ka ka jingkylla ka suiñbneng bad ki jingthmu ba kongsan.
Ka tnat Khlaw bad Mariang ka la pynleit jingmut ha ki jingpyrshang ban pynkylla ïa ka suiñbneng, khamtam eh ïa ki lad ai pisa bad ka jingpynmih ïa ki marpoh khyndew.
Ka tnat Soil and Water Conservation ka la pyni shaphang ka rukom pynïaid ïa ki wah bad ki rukom pynneh pynsah. Ka Meghalaya State Pollution Control Board ka la ai ka jingkhmih bniah ïa ka jinglong-jingman jong ka mariang mynta ha kylleng ka Jylla.
Shuh-shuh, ka komiti ka la ïashim bynta ha ka jingbishar bniah ïa ki jingpyni, da kaba ïoh ïa ki jingshemphang kiba kordor shaphang ka jingheh, ka jingktah, bad ka jingïaid lynti ha ka lawei jong ki jingthmu jong kawei pa kawei ka tnat.
Ki jingïakren ki la pynpaw ïa ka jingdonkam jong ka jingïatreilang hapdeng ki tnat, ka jingthmu kaba jrong, bad ka jingtreikam kaba stet halor ka jingkylla ka suiñbneng ban pynthikna ïa ka jingpynneh jingpynsah ïa ka mariang.
Na ka liang u Chairperson, Bah Wailadmiki Shylla u la ong, “Ïa kane ka jingïalang hapoh la khot khnang ban pynsuk ïa ka jingïadei beit bad ki tnat kiba ïadei bad ki jingeh ha ka mariang bad ka jingkylla ka suiñbneng ha ka Jylla. Haba pyrkhat ïa ka jinglong jingman kaba mynta, ka long kaba donkam ban sngewthuh ïa kiei ki lad ki lynti kiba don bad kiei ki buit treikam kiba jrong por kiba la bud. Ki jingkren ki long kiba ai jingtip bad kiba bniah, kiba pynpaw ïa ki jingthmu bapher bapher jong ka tnat bad ki jingthmu ha ka lawei kiba ktah ïa ki ar ne lai phew snem ban wan. Ka komiti ka la ai ruh ïa ki jingai jingmut kiba tei ban pynkhlaiñ shuh shuh ïa kine ki jingpyrshang. Ka jingïalang mynta ka sngi ka la long ka sienjam kaba kongsan ban tei ïa ka buit treikam kaba ïadei bad kaba lah ban ïaleh pyrshah ïa ka mariang na ka bynta ka Meghalaya.”
Ka komiti halor ka mariang ka la pynskhem biang ïa ka jingkular jong ka ha ka bynta ban peitngor bad ka la pynksan ïa ka jingdonkam jong ki jingpyrshang kiba neh, kiba ïatreilang ban ïada ïa ka lawei jong ka mariang jong ka Jylla.
