Shillong, Jylliew 03
Ki pulit SDRF bad ki pulit NDRF ryngkat ka kynhun kaba la tip kum ka West Jaiñtia Hills District Adventure Sports and Mountaineering Club (WJHDASMC) kaba dei ka kynhun kaba ïarap da ka mon sngewbha ban wad ïa ka Sonam Raghuvanshi ka kurim u Raja Raghuvanshi hapoh ka jingïalam u samla Sambor Surong nongshem jong kane ka kynhun, ki la sangeh shwa ban wat ïa ka Sonam ha arliang riat marjan bad ka Weisawdong mynta ka Sngi Ba ar, namar ka jingbym lapdien eiei bad kin bteng pat ban wad sa ha kiwei de ki jaka.
Ki pulit ryngkat bad kane ka club na West Jaiñtia Hills ki la sdang ban noh sha arliang riat, ka jaka ba lap ïa ka met ïap u Raja naduh ka por 10:30 mynstep bad haduh ka por 1:30 ki la kiew biang sha jrong ban sangeh shwa ïa ka jingleit wad.
Haba ïoh ban ïakren bad u Bah Sambor u la ïathuh, ba ki la leit ban wad biang ïa ka Sonam sha ki jaka ba marjan ka jaka ba lap ïa u Raja, ban lap sa ïa katei ka kurim, hynrei haduh shiteng sngi kim shem lap bad ïohi eiei.
U Bah Sambor u la ong, ba kam shem don eiei ka jingsma tang khyndiat ruh namar lada don ka jingsma ki lah ban suba ba ka Sonam ka don ha kitei hi ki jaka.
“Ngi lah hiar biang ïa kajuh ka lynti ryngkat bad ki pulit SDRF bad ki pulit NDRF, ban rung ruh sha ki jaka krem ba jylliew, ban wat ïa katei ka kurim u Raja bad wat haduh bun bun kynta ki la don shapoh katei ka riat, hynrei khlem ïohi dak eiei”, la ong u Bah Sambor.
U la ïathuh ruh ba kane ka riat kaba ki la noh shapoh ka don haduh kumba 200 metre eiei ka jingjrong jong ka ban wad ïa katei ka kurim u Raja. Ngi lah ïa ïaid ïa shibun ki jaka hapoh jong kane ka riat ban rung sha ki krem, ba ïoh kumno-kumno ki briew ba pynïap ki thep hapoh ki krem.
Wat la katta, u samla Sambor u la ong ba ngin ïa trei bor met ban wad pynïoh sa ïa ka kurim jong u Raja, namar ka jylla jong ngi ka la shah kynnoh ba ka dei ka jaka bajur ki kam sniew. Kumta ngin trei shitom lang bad ki pulit ban lapdien sa ïa katei ka kurim khnang ba ka jylla jongngi kan ym shah kynnoh sniew.
“Haduh mynta kim pat tip eiei ïa kane ka jingjia ba ka jia kumno, la ka dei ka jingshah pynïap ne ki ïap hi ruh, hynrei tang u ba najrong u ba lah ban tip ïa kata baroh”, ong u Bah Sambor.
U Bah Sambor u la kyrmen ruh ba ha kine ki sngi ban dang wan kin sa lap sa ïa kane ka kurim jong u Raja, ba ïoh lehse ha ka jingpynïaid jong uba najrong, ïoh ka dang sahkut shano-shano ne ïoh ka dang mynsaw bad u la kyrmen ruh ïa kaba bha.
Shuh shuh u la ïathuh ba ka kynhun jong u kiba don 6 ngut ki la sdang ban wan ïarap wad ïa kine ar ngut shikurim da ka mon sngewbha lajong naduh hynnin ka sngi nyngkong, ha kaba da ka jingïarap wad jong ki ryngkat bad ki pulit ki la lap ïa ka met jong u Raja Raghuvanshi napoh ka Arliang riat marjan bad ka Weisawdong.
