Williamnagar, Jylliew 03
Ka Garo Students’ Union, Williamnagar ka la kyntu ban weng noh mardor ïa u DTO jong ka distrik (EGH) hadien ki jingujor halor ka jingkhlemakor bad ka jingbym wan trei jong une u ophisar.
Halor kane, ka seng ha ka Lah Sngi U Blei ka la sdang ïa kaei kaba ka khot ka jingïakhih kaba nyngkong (lyngba ka ‘Poster Campaign’) na kiba bun kiwei pat ki jingïakhih lada ym lah ban weng noh ïa une u ophisar.
“Kane ka jingdawa ka mih hadien kiba bun ki jingujor na ki paidbah ha kaba ïadei bad ka jingkhlemakor ha ka kam bad ka jingleh ka bym ïahap jong u ïa ki paidbah nongshong shnong,” ong u President, Goera Marak.
Ka seng ka la kynnoh ba u DTO u pynlut bun na ka por (jong u) ha ka jaka sah, wat hapdeng ki kynta por treikam jong u bad um ju da kham leit sha ophis.
“Ha ka jaka ban pyndep ïa ki kam jong u na ophis, la ïathuh ba u soi ïa ki kot ki sla na ka jaka sah jong u. Ki nongshong shnong, kynthup ïa ki nongaplai, bunsien kim banse ban leit sha jaka sah jong u ban ïoh ïa ki jingsoi. Ki la don ruh ki jingkynnoh kiba pynkulmar jingmut ba teng-teng la lap ïa u hapdeng ka jingshoh u ‘khawiang bad u pyndonkam da ki ktien bym don burom bad ki bym ïahap haba kren ïa ki ‘riew paidbah,” ki la kynnoh.
Da kaba pynpaw ba ma ki ruh ki la mad ïa kawei na ki jingjia kaba la jia ha ka 30 tarik u Jymmang – haba ki dkhot jong ki, ki la leit sha ka jaka sah jong u DTO ban ïoh jingsoi ïa ki aplikeshon laisen ñiah kali jong ki.
Ki la kynnoh ba ki la shah pynjah burom ha utei u ophisar.
“Kum kane ka jingleh ka long ka bym lah ban pdiang bad ngin ym shah ïa kane jingpynjah burom ïa ki dkhot jong ngi ne ki paidbah ka EGH. Ngi dawa ban pynkynriah kam mardor ïa u DTO ba mynta, bad kyntu ïa ka Sorkar ban thung noh da u ophisar uba beit, uba don ka jingkitkhlieh bad uba ïadei bad ki paidbah ha ka jaka jong u. Lada ki bor synshar kim shimkhia ïa kane, ngin sa hap ban pynjur ïa ka jingïakhih jong ngi lyngba ki lynti kiba jai-jai,” ki la pynskhem
