Shillong, Jylliew 03
Ki bahaïing jong ar ngut shikurim kiba dang shu dep shong kurim shen, kata u Raja Raghuvanshi bad ka Sonam Raghuvanshi na Indore, ki la dawa da ka jingtohkit jong ka Central Bureau of Investigation (CBI) halor ka jingïap u Raja Raghuvanshi kaba ïa ka met la lap ha Weisawdong, Sohra ha ka 2 tarik Jylliew 2025.
Haba ïakren bad ki nongthoh khubor shabar ka jaka buh metïap ha NEIGRIHMS Shillong, u hynmen jong u Raja, u Vipin Raghuvanshi u la kyntu ïa u Myntri Rangbah ka Meghalaya u Conrad K Sangma ban aiti noh ïa ka jingtohkit sha ka CBI.
Une u hynmen u la kynnoh ba ka lah ban don ka jingbuhrieh da ka Sorkar Meghalaya, namar ba ki bor synshar ki sngew artatien ban kam ba kane ka dei ka jingpynïap briew.
U la pynpaw ba u kwah ban tip kumno la lap ïa ka met jong u hynmen jong u kaba jngai 25 kilomitar na ka jaka ba la pynïeng ïa ka scooty sha Sohrarim.
Shuh shuh, u la suba ba ka jinglap ïa katei ka met na ka thliew kaba jylliew, kam dei kaba la pynïap hi dalade hynrei u suba ba don ba pynïap ïa u para jong u.
U la ïathuh ba u Raja bad ka Sonam ki dang shu dep ïathoh dang shen ha ka 12 tarik u Jymmang.
U la pynpaw biang ïa ka jingsuba ba ka don ka jingleh bymman, da kaba kynnoh ba u Raja u lah ban shah rahbor bad shah pynïap.
U la ong biang ba ki tiar na ka met jong u Raja ba kynthup ar tylli ki sati ksiar, u kynjri ksiar, u jingdeng ksiar, ka pla pisa, ki mobile phone ruh ki la jah na ka met u Raja.
“Lada dei ka jingjia jong ka jingpynïap ïalade ne ka jingjia aksiden, kine ki tiar kin ym jah satia”, u la ong bad bynrap ba kam lah ban long ba u para jong u bad ka kurim kin ïa noh ïap hi namar ka jaka kaba lap ïa ka metïap jong u, ka dei kaba don ïa ka jingker kaba biang.
U la kyrpad shuh shuh ban pynjur ïa ka jingpyrshang ban wad ïa ka para kynsi jong u kaba dang jah kat haduh mynta.
Ha kajuh ka por u la pyntip ba hadien ba la dep ban leh ‘post mortem’ ïa ka met jong u Raja, yn sa rah noh sha Indore bad u don jingkyrmen ba ka kaiphod jong ka post-mortem kan ai jingshai ïa kaei kaba la jia.
