Shillong, Jylliew 03
Lai ngut ki khynnah ïalehkai Mix Martial Arts (MMA) ka Jylla ki la wanrah burom da kaba ïoh jingjop ha kane ka jingïalehkai ba la pynïaid da ka Tribe Fighting Cage ha Arunachal ha ka 1 tarik mynta u bnai.
Kine ki long u Klevin Shai Nongbri, ka Naphi Sohtun lem bad ka Nazreen Marbaniang. Kine ki khynnah ki dei kiba la shah pyntbit ha ka Beast Fitness Gym hapoh ka jingai jinghikai jong u nongïalehkai ba paw ka Jylla u Jave Sohtun.
Kat kum ka jingïathuh jong utei u nonghikai ka Beast Fitness Gym, la ong ba kitei ki khynnah ki la shah jied ruh ban ïalehkai ha ka Pro Cage Fight ka ban sa long ha u bnai Risaw mynta u snem ha Arunachal.
Nalor jong kitei lai ngut, ki la don sa san ngut kiwei pat kiba la leit shim bynta sha katei ka jingïakob kiba kynthup ïa ka Datiplang Kharjana, Isabella Sohtun, Lajied Lang Sohtun, Joshua Massar bad u Jave Sohtun kiba la shah rem noh.
